ليکوال: عبدالله زاهد
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.
د شر او فساد ډلې هدف يواځې واک او پيسه ده؛ دوی ته دا فرق نه ورکوي چې پيسه څوک ورکوي، څوک يې وطن يرغمل کوي، څوک يې وطنوال وژني، او څوک د افغان ولس په عزت او وينو سوداګري کوي؛ بس چې دوی ته پيسې رسېږي نو هر څه ته تيار دي او د دې لپاره د هر بهرني طاقت په خدمت کې وي.
دوی د تاریخ په اوږدو کې يواځې همدا کار کړی؛ ولس يې وژلی، په ولس کې يې تفرقه او کورنۍ جګړې جوړې کړي او دا وطن يې لوټې، لوټې کړی؛ د بېلګې په توګه د ۱۹۹۰ مو کلونو جګړې، په ځانګړې توګه د ټوپک سالارۍ دور، هغه مهال چې د واک پر سر يې پاټک سالاري جوړه کړې وه کوم چې د افغان ولس لپاره د ویرې او تفرقي یوه دوره وه.
په دغه وخت کې د افغان ملت د جهادي مبارزې وروسته د پياوړتيا، اسلامي نظام او اتحاد پر ځای د دې ډلې له لوري د خیانت او درغلیو یوه لړۍ پیل شوه؛ د وژنو، تعصب، او د افغانستان د وېش د خوبونو ليدل پيل شوه، د افغانانو عزت او مالونه لوټل پيل شوه، د چور او فساد يوه لړۍ راپيل شوه او دا ملت و وطن يې تباه و برباد کړ.
د شر او فساد ډله د ټوپک سالارۍ په دور کې د آی ايس آی و ډول ته ګډېدل؛ تر څو د واک په راتلو کې له دوی سره مرسته وکړي. آی ايس آی له دې ډلې څخه په ګټه اخيستنې افغان وطن لوټې، لوټې او افغان ولس کې يې بدبيني وروستي حد ته ورسول.
د بن په کانفرانس کې چې د ۲۰۰۱ کال د ډسمبر په ۵مه نېټه ترسره شو؛ دوی امريکايي يرغل ته لبيک و وايه تر څو جعلي سلطه او شتمني ورته و رسېږي؛ د دې کنفرانس په ترڅ کې د طالبانو د حکومت د ختمېدو او د نوې حکومت د جوړولو لپاره ناستې او پرېکړې وشوې، کوم چې د دې ډلې ترمنځ د قدرت او پيسو د ترلاسه کولو لپاره یوه طلايي موقع وه؛ چې دوی ته يې د شلو کلونو د لنډغرۍ، جعلي واک او شر و فساد زمينه برابره او غوښنه برخه د نظام ورته وسپارل شوه.
دوی هر بهرني جاسوسي سازمان ته جاسوسي د همدې پيسو او جعلي واک لپاره کړې؛ اوس هم د نړۍ هر ځواک ته په زاريو دي چې «موږ ستاسو هر امر پر سر سترګو منو او افغانستان کې هر هغه څه چې تاسو يې غوښتنه لرئ، موږ يې درکوو، خو زموږ سره د بيا ځلي جعلي واک اخيستلو کې مرسته وکړئ».
د روسي يرغل له خاتمې سره، چې په ۱۹۸۹ کال کې د افغانستان له خاورې و وتل، دوی د روسانو سره اړيکې جوړې کړې وې تر څو واک ته و رسېږي؛ دوی د روسي اشغال پر مهال نه يواځې دا چې مجاهدين يې ځانونه بلل، بلکې د روسي پوځ سره اړيکې یې هم د قدرت د ترلاسه کولو لپاره ساتلې.
دغه د اقتدار تنده د دوی د غلامۍ د داستان او د دوی د اقتدار په لور لومړنی قدم وو او له همغه ورځې څخه د اقتدار لوږې لېوني کړي؛ جعلي واک پسي لالهانده ګرځي او وطن، ولس، عزت او هر څه يې تر پردو قربان کړي.
شلو کلونو کې د دې ډلې لنډغري، قتل عام، او ولس کې تفرقه د غرب د خوشحالولو لپاره تر سره شوه؛ البته بادار يې له دوی څخه د کار اخيستلو پس دوی خوشي پرېښودل.
اوس د طالبانو د بياځلي واک ته رسېدو سره؛ دوی نه يواځې غرب بلکې روس، تاجکستان، ايران او پاکستان ته هم زارۍ کوي چې ستاسو هر خواهش او هدف به افغانستان کې عملي کېږي، خو بس تاسو راسره مرسته وکړئ!
په ۲۰۲۳ کال کې په پاکستان کې د داعش او شر و فساد ډلې تر منځ د آی ايس آی په رهبري کې غونډې وشوې چې دوی له يو او بل سره تسليحاتي او مالي مرستو توافق ته سره ورسېدل.
په پاکستان کې د بلوچستان په سيمه کې دغه دواړې ډلې د آی ايس آی په رهبري کې روزل کېږي؛ دا غونډې د دې لپاره وې چې د دې ډلې تر منځ همکاري او اړيکې پياوړې شي، تر څو د طالبانو او افغانانو مخالف په ګډه وجنګېږي او وکولای شي افغانستان کې ګډوډي رامنځته کړي، بيا ځلي د غربي ګټو مدافعين شي.
د دغې ډلې اصل هدف جعلي واک، پيسه، او د افغانانو قتلول دي؛ دوی د هرې ډلې سره يو کېدلای شي، هرې ډلې او هر بهرني طاقت ته چې وي کار ورته کوي، د دوی شعار صرف د افغانانو د تير ايستلو لپاره دی، ځکه کردار کې يې يواځيني هدف جعلي واک و پيسه ده؛ دا ځکه چې داعش د خلافت دروغجنې زمزمې ږغوي او دوی د وطن دوستۍ، قومپرستۍ زمزمې؛ مګر دواړه بيرته پر يوه دسترخوان کې راټول شوي او دواړو د غرب او آی ايس آی د ګټو خونديتوب ته ملا تړلې.
