یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.
هره عقيده او مفکوره چې سياسي واک و نه لري، د نړۍ د انسانانو ترمنځ رسوخ نه شي کولای، چې د هغې له جملې څخه ډېموکراسي هم ده، چې جمهوريت يې د تنفيذولو لپاره د تورې حيثيت لري.
که په يو مملکت کې ډيموکراسي تنفيذ او واک جمهوري شي، ټول هغه اهداف چې غرب یې غواړي، هغه که سيکولرېزم يا مطلقه آزادي ده، که د لنډغرو او بې غیرته حاکمانو مسلطول دي، که د پارلمان اېجادول دي، که د ميډيا بې بنده باره آزادي ده، که د کلیساوو مشروعيت دی، که د اسلام دښمنه پوځ رامنځته کول دي، که د غرب ملګري په واک کې ساتل دي، که د ليکوالانو او مفکرینو خريداري ده، که د ديني او معنوي ارزښتونو له منځه وړل دي، که د هېواد په ښارونو کې د شرابخانو او فحشاوو د اډو جوړول دي، که د ځوانانو په فېشن، لوبو او د پردیو په تقليد مصروفول دي، که منحرفو فرقو او نظرياتو ته آزادي ورکول دي، که بې شريعته اسلام رامنځته کول دي، که د تعليم لا دينه کول دي، که د تعليمي ماحول غربي کول دي، که نشنلیزم او وطنيت رايجول دي، که د ميډيا له لارې د فکرونو تسخیرول دي، که… که… که… لنډه دا ټول هغه اهداف چې غرب یې غواړي، د هغې د لاسته راوړلو لپاره، جمهوريت د لارې او پُل حيثيت لري.
بناءً په افغانستان کې د جمهوریت ترخه تجربه خپله جمهوریتیان ښه درک کولای شي، په تېره اداره کې د فراه، نیمروز او ارزګان د استخباراتو رئیس جنرال صمد شمس الدین یو غږیز کلیپ مې واورېده، چې نوموړی په خپلو خبرو کې وایي: مونږ شل کاله ډېره فاسده او خونخواره رهبري درلوده، چې هغه د حامد کرزي تر مشرۍ لاندې ټیم وو، چې ډېر فاسد او مفسد وو، غله، رشوت خواره او شراب خواره وو، چرسیان او بنګیان وو، لوچک او لوفر وو.
او وایي: زه په افغانستان کې نور د هېڅ جنګ ملاتړی نه یم، او نه دې کار ته څوک هڅوم؛ زه د اسلامي امارت سره د مسلحانه حرکت مخالف یمه.
اشرف غني د دنیا جعلي متفکر وو، دی او ټیم یې د جامعې او نړۍ تر ټولو پست انسانان وو، دوی حاکمان شول، هغوی د افغانستان له خلکو سره څه وکړل؟ بناءً د اسلامي امارت په وړاندې هر ډول نظامي حرکت ناروا دی، نور د افغانستان د خلکو د وینې تویېدو هېڅ مشروع لار نشته او نه به وي.
جمهوريت د غرب په لاس کې داسې يوه توره ده، چې ټول اسلامي مملکتونه يې پرې غوڅ، غوڅ کړل، اسلامي بنيادونه يې پرې ونړول، مسلمان يې د مسلمان دښمن وګرځاوه، مسلمانان یې په خپلو خاورو او وطنونو کې، يو د بل په خوړلو سره مصروفه کړل او دوی په آرامه فضا کې د مسلمانانو د مړو، يتيمانو او کونډو رنډو سرشمېرنه کوي. او بس.
ماخذونه:
۱- د يرغل پر وړاندې- مولوي عبدالهادي مجاهد.
۲- د افغانستان اساسي حقوق- ډاکټر عبدالعلي محمدي
