د دوحې د څلورمې ناستې د درولو غوښتنه په حقیقت کې د څو محدودو اشخاصو له خولو راپورته شوي افواهات دي، چې هڅه کوي خپله سیاسي ماتې د ولسي استازولۍ په نوم تعبیر کړي، خو ملت نور نه تېر وزي، د اشغال تکرار نه غواړي او هغه څهرې بیا نه شي زغملای چې تل یې د پردیو اجنډاوي پر افغان ولس تحمیل کړې دي.
آزادۍ جبهه د خپلې سیاسي انزوا د جبران، د نړۍوال ملاتړ د ترلاسه کولو، د پخواني فاسد رژیم او اشغال د بیا راستنېدو لپاره د دوحې د څلورمې ناستې په ضد غوغا جوړه کړې او خپلو شومو موخو ته د رسېدو لپاره دا غږ بدرګه کوي. په ټوله کې د دې هڅو هدف دا دی چې افغانان له خپلواک تصمیم او ملي حاکمیت څخه بې برخې کړي او یو ځل بیا افغانستان د پردیو د لوبو ډګر وګرځوي.
هغه څوک چې هر مشروع تړون او د افغانستان په ګټه هره جوړېدونکې ناسته د خپلو عقدو قرباني کوي، باید پوه شي چې د افغان ملت حافظه نه ضعیفه ده او نه بې لارې کېدونکې. ولس اوس پوهېږي چې د ملت پر سر د سیاسي سوداګرۍ شا ته څوک ولاړ دي.
د دوحې څلورمه ناسته به افغانستان د نړۍوال مشروعیت خوا ته نور هم نږدې کړي، خو ټول سیاسي سوداګر او نا مشروع ډلې به منزوي او د تل په څېر د ناستو له اجنډاوو څخه ووځي.
یادؤنه: په هندوکش غږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکش غږ توافق ورسره شرط نه دی.
