د روغتیا نړیوال سازمان خبرداری ورکړی، چې د ژمي او باراني موسم په رانږدې کېدو سره په غزه کې روان روغتیايي او بشري ناورین لا پسې پراخېدای شي، ځکه ډېری بېځایه شوي کسان په ګڼ مېشتو کمپونو او لنډمهالو خیمو کې ژوند کوي.
د دغه سازمان د معلوماتو له مخې، د روان کال له جنورۍ تر اګست پورې د غزې د اوبو له ۶۷۰۰ څخه د زیاتو نمونو له څېړلو وروسته په اوبو کې میکروبي ککړتیا نږدې درې برابره شوې او په همدې موده کې د نس ناستې پېښې له شاوخوا ۲۷ زرو څخه ۴۸ زرو ته لوړې شوې دي.
د ملګرو ملتونو چارواکي وايي، بارانونه د بېځایه شویو په خیمو کې د سیلابونو، فاضله اوبو او ککړتیا د خپرېدو خطر زیاتوي او د ناروغیو د پراخېدو زمینه برابروي.
د روغتیا نړیوال سازمان د دایمي سرپناه، پاکو اوبو، د کثافاتو د مدیریت سیستمونو او د ناروغیو د تشخیص لپاره د لابراتواري امکاناتو د برابرولو غوښتنه کړې ده.