د عامې روغتیا وزارت په یوه خبرپاڼه کې ویلي، چې د یاد وزارت د روغتیايي خدمتونو وړاندې کولو مرستیال مولوي عبدالولي حقاني د یوه تخنیکي پلاوي په ملتیا د وزیر محمد اکبرخان روغتون له بېلابېلو څانګو لیدنه کړې او د روغتیايي خدمتونو وضعیت یې ارزولی دی.
د عامې روغتیا وزارت وایي، نوموړي د روغتون ستونزې په نښه کړې او مسوولینو او روغتیايي کارکوونکو ته یې سپارښتنه کړې، چې د ناروغانو او مراجعینو د ستونزو د حل ترڅنګ، روغتیايي خدمتونه پر وخت او له ځنډ پرته وړاندې کړي.
حقاني د لیدنې پر مهال له ناروغانو سره هم کتلي او له روغتیايي کارکوونکو یې د مراجعینو او ناروغانو د غوره چلند او بشپړې پاملرنې غوښتنه کړې ده.