د افغانستان ستره محکمه وايي، د دې محکمې د جزا دېوان عمومي مشر خوست ته تللی، څو هلته له ولایتي استازو سره وگوري او د دوی ستونزو ته رسېدنه وکړي.
له سترې محکمې څخه په خپره شوې خبرپاڼه کې ویل شوي، د سترې محکمې د جزا دېوان عمومي مشر عتیق الله دروېش د حکومتي ادارو د مسوولینو ترمنځ د همغږۍ د لا پیاوړتیا او یو شمېر جزايي دوسیو د حل او فصل په موخه خوست ته تللی دی.
د خبرپاڼې له مخې، نوموړي د خوست له والي، مرستیال والي، امنیه قومندان، ولسوالانو، د امربالمعروف، نهي عن المنکر او شکایاتو د اورېدو ریاست، د علماوو شورا او د استخباراتو له رئیس او نورو اړوند حکومتي ادارو له مسوولینو سره لیدلي دي.
ښاغلي دروېش د خوست ځايي مسوولینو ته ویلي، د چارو د ژر او اصولي تر سره کولو په موخه دې له یو بل سره د اصولو په هر رڼا کې غښتلې همغږي وکړي؛ ځکه د ځینو چارو کول د څو ادارو له همغږۍ او همکارۍ پرته ناشوني دي.:«ټول ولایتي مسوولین دې د هېوادوالو ستونزو ته پر وخت رسېدنه کوي، له مراجعینو سره دې نېک چلند کوي او په خپل ټاکلي وخت دې دندو ته حاضرېږي.»
نوموړي د دې سفر پر مهال په خوست کې دوه مهمې جزايي دوسیې هم حل او فصل کړي او هم یې د خوست له مرکزي زندان له زندانیانو څخه د دوی د وضعیت پوښتنه کړې ده.
ځینې خلک شکایت کوي چې په محاکمو کې یې دوسیې له څو کلونو راهیسې پرتې دي او د ولایتي محاکمو سربېره د ولسوالیو محکمې یې هم دوسیو ته ژر رسېدنه نه کوي، چې له امله یې دوسیې نه حل او فصل کېږي.