الجزیرې راپور ورکړی، چې د سوریې ولسمشر احمد الشرع ویلي، حکومت یې له اسراییل سره د یوې امنیتي هوکړې د ترلاسه کولو هڅې کوي، ترڅو د دواړو لورو ترمنځ هر اړخیزې سولې ته لاره هواره شي.
الشرع ټینګار کړی، چې سوریه نه له اشغال شوي جولان څخه تېرېږي، نه له اسراییل سره د ټکر غوښتونکې ده او نه هم په لبنان کې د پوځي مداخلې اراده لري، بلکې د خبرو اترو له لارې د ټولو شخړو د حل ملاتړ کوي.
نوموړي زیاته کړې، چې یوازې د اقتصادي بندیزونو لرې کېدل بسنه نه کوي او تر هغو به بشپړه ګټه ونه لري، تر څو سوریه د ترهګرۍ له لېست څخه ونه ایستل شي.
د سوریې ولسمشر همدارنګه ویلي، له کردانو سره د شوې هوکړې پلي کېدل که څه هم ورو روان دي، خو دمشق یې د بریالي کېدو په اړه لویې هیلې لري.