هندوکشغږ ته د رسېدلو اطلاعاتو پر بنسټ، د تش په نوم آزادۍ(پاوربانک) جبهه کې د اختلافاتو په دوام، دا ځل د یاسین ضیاء او د هغه د اوښي صفي الله محمدي ترمنځ اختلافات رامنځ ته شوي او تر داسې حده رسېدلي چې پاکستانی پوځي رژیم هم پر دوی په کړې پانګونه وېرېدلی دی او اوس هڅه کوي چې په چترال کې د پاتې ډلو غولېدلي غړي د پښتنو، تاجکانو او نورو قومونو یا پښتو، دري یا نورو ژبو تر عنوان لاندې ووېشي او بیا ځلي یې د خپل هېواد په ضد جګړې ته وهڅوي.
د یاسین ضیاء او په چترال کې د آزادۍ(پاوربانک) جبهې د غولېدلو غړو د قوماندان صفي الله محمدي ترمنځ د امتیازاتو پر سر او دا چې ولې یې د چترال له لارې افغانستان بې ثباته نه کړ، اختلافات رامنځ ته شوي او محمدي اړ شوی چې لندن ته لاړ شي. په داسې حساس وخت کې چې پاکستاني پوځي رژیم د افغان حکومت دغه مخالفې ډلې ته څو میاشتې امتیازات ورکول او دې ته یې هڅول چې د چترال له لارې په نورستان او نورو سیمو کې د افغان حکومت په ضد د یو خبیث مثلث د غړي په توګه رول ادا کړي، خو آزادۍ جبهه له شرمندګۍ او ماتې سره مخ شوه.
په آزادۍ جبهه کې راټوکېدلي اختلافات د آی ایس آی له پرله پسې مداخلو سره سره په پوره توګه نه دي حل شوي، بلکې لا یې زور اخیستی، چې په ضمن کې د پوځي رژیم ټاکل شوې موخې د یادو اختلافاتو د دوام له امله معطل او همدا راز د یخنۍ د پیلېدو له امله نورو مناسبو موسمونو ته وځنډېدې؛ خو بیا هم هڅه کېږي چې په چترال کې پاتې غولېدلي ځوانان د قومونو یا ژبو په عنوان ووېشي او د جګړې بڼه او شعارونه بدل کړي.
د سرچینو د اطلاعاتو پر بنسټ، پاکستانی پوځي رژیم چې په چترال کې یې د تش په نوم آزادۍ جبهې سره په ګډه د خبیث مثلث له لارې موخې ترلاسه نه کړې، بلکې آزادۍ(پاوربانک) جبهه د اختلافاتو له امله منحرفه شوه، چې له امله یې پوځي رژیم پر دغه ډله په خپله پانګونه پښېماني څرګنده کړې او دا مهال پر نورو هغو تورو څېرو کار کوي، چې په تېر کې هم د نیابتي جګړې او پردیو د غلامۍ تور تاریخ درلود.
د یادونې وړ ده چې په نورستان کې د تش په نوم آزادۍ جبهې له ماتې او ګڼ شمېر غړو تر نیول کېدو وروسته هم په دغه جبهه کې درزونه او اختلافات رامنځ ته شوي وو او د صفي الله محمدي په شمول د دغه ډلې محلي قوماندانو هڅه کول چې د ماتې پړه پر یو بل واچوي او پوځي رژیم ته د دغه ماتې ځواب ووایي؛ هلته هم ښکېلو قوماندانو ته د ډلې دننه دسیسې جوړې شوې وې او هڅه کېدل چې فضل ربي خنجاني په معامله تورن کړي. خو دغه اختلافات لا پیاوړي شوي، چې اوس د یادې ډلې تر اصلي کړۍ رسېدلي دي.


