د شر او فساد لارویان د درې کلونو په تېرېدو، په هره برخه کې له شرمناکې ماتې سره مخ شوي، له خپل ټول توان سره – سره ونه توانېدل چې په هېواد کې یوه لوېشت خاوره ونیسي، د اړتیا تر کچې یې د سیمې او نړۍ ملاتړ هم ترلاسه نه کړ، په ولس کې هم تر پخوا لا منفور شول؛ اوس مهال په بې سارې کچه بې سوژې شوي او نه پوهېږي چې په څه ډول د طالبانو په خلاف تبلیغاتو له لارې، نړۍ ته د افغانستان شته انځور ناسم وښيي او د ولس او حکومت تر منځ واټن رامنځ ته کړي.
نه تنها چې د شر او فساد لارویان بې سوژې شوي، بلکې د طالبانو مخالفې رسنۍ، چې د بهرنیو استخباراتي سازمانونو او شر او فساد لخوا یې ملاتړ کېږي، هم بې سوژې شوي او له ورته انجام سره لاس او ګرېوان دي.
که د افغانستان په څلوېښت ميليونه نفوس کې چیرته هم يو څوک د موټر په ټکر، د ګاز ډبې د چاودنې، جنايي پېښې، شخصي دښمنۍ او يا هم نورو غیر سیاسي پېښو له امله ژوند له لاسه ورکوي، بغاوتګر او بې سوژې رسنۍ یې وژل کېدل طالبانو ته منسوبوي؛ اصلاً له دې لارې غواړي چې ولس پر حکومت بې باوره کړي او واټن رامنځ ته کړي.
که د نړۍ هغه هېوادونو ته ځیر شو، چې په ټوله نړۍ کې د امنیتي وضعیت د ښه والي له امله، په درجه بندۍ کې له لسو غوره هېوادونو شمېرل کېږي، بیا هم په کې د جنايي پېښو له امله هره ورځ لسګونه تنه خپل ژوند له لاسه ورکوي.
دا منل شوې خبره ده، کله چې په هېواد کې امنيت تأمين وي، د شر او فساد ډلو د تخريبي فعاليتونو مخه نیول شوې وي او مياشتې، مياشتې امنیتي پېښې د رسنیو سرټکي نه وي، بیا د موټرو ټکرونه، د ګاز ډبې چاودنې او نورې جنایي پېښې د دولت د مخالفينو لپاره د منفي تبلیغاتو موقع او سوژه وي، له دې سوژې په استفاده غواړي عامو وګړو ته وښيي چې په هېواد کې لا هم حالت سم نه دي او هره ورځ د وژنې راپورونه شته.
په نوره نړۍ کې جنايي جرمونه او مرموزې وژنې يو عادي مسئله ده، خو څومره چې د طالبانو مخالفي رسنۍ د سوژې په ډول پوښښ ورکوي، کم ساري دي؛ ځکه له کله چې بې سوژې شوي، نو جنايي پېښې هم حکومت ته منسوبوي. د افغانستان اوسنی وضعیت د جنايي پېښو په لحاظ هم تر ډېرو هېوادونو بهتر دی، ځکه په نوره نړۍ کې دغه ګراف خورا لوړ دی؛ د اسټراليا “ایس بي سي” رسنۍ په (۲۰۲۴م) کال کې، د جنايي جرمونو، مرموزو وژنو او نورو جرمونو اړوند د (۱۴۶) هېوادونو ارقام را ټول او تحليل کړي دي، په دې خپرو شويو ارقامو کې وينزويلا د (۱۴۶) هېوادونو په ډله کې لومړی، د افريقا پاپونيګينا دوهم، هاتي دريم او ورپسې نور هېوادونه هم دي، په دې ډله کې ايران، ترکيه او امريکا هم ياد شوي دي.
په افغانستان کې ځکه جنايي پېښو ته سیاسي رنګ ورکول کېږي، چې د طالبانو حکومت د پرمختګ په حال کې دی، له سیمې او نړۍ سره یې ورځ تر بلې اړیکې پراخېږي، بیا رغونه روانه ده، د حکومت او ولس تر منځ واټنونه پر کمېدو دي، چې له امله یې شر او فساد خپله دایمي ناکامي حس کړې؛ دوی به حتمي هڅه کوي چې له افغانستان څخه ناسم انځور وړاندې کړي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.
