د افغانستان په خاوره کې د لومړي ځل لپاره د فساد او بغاوت بنسټ د افراطي نشنلیسټ احمدشاه مسعود له لورې کېښودل شو، چې نوموړي د خپل افراطي او پلورل شوي فکر د تطبیق لپاره د نړۍ د ټولو استخباراتي ډلو پښو ته ځان وغورځاوه، تر څو خپل خبیث هدف ته ځان ورسوي.
دوی د وطن په جغرافیه کې داسې نخرې او نادودې وکړې، چې له امله یې تر ننۍ ورځې هره کورنۍ په زړه داغونه وړي.
د شر او فساد ډلې له چا پلار واخېست، له چا یې ورور او تره، له چا یې پوستکي وایستل او له چا یې سرونه پرې کړل، چې د ځینو وګړو به تنې پیدا شوې، سرونه به یې نه وو او چې سرونه به یې پیدا شول تنې به یې نه وې.
خو ددې پر ځای چې شریرو او مفسدو بُغاتو د خپل کړي جنایاتو جبیره کړې وای، برعکس یې د کفر یوه بله ډله د توپ، ټانګ، بارود، ټوپک او ډول-ډول د وحشت له آلو سره راوغوښته او په دې خپلواکه ځمکه کې یې تیت او پرک کړه.
د شر او فساد ډله ناټو ته تیارسۍ او په مخکې یې د سپر په څېر روانه وه، چې له شوروي یرغل وروسته یې بیا د قومپالنې مردودې نظریې ته ناټو په غېږ کې کار وکړ او امریکا ته یې پښتانه د طالبانو او القاعدې په نوم د ډالرو په بدل کې ور پېژندل چې هغوی بیا د بګرام او ګونتانمو تر زندانونو ورسول او تر ننې ورځې پکې هم ځینې افغانان د وحشت او خفګان سخت حالت تېروي.
الله تعالی په ځمکه کې انسان ته د توبې ویستلو لپاره بار-بار موقع ورکوي، خو دوی د الله تعالی په هېرولو سره داسې ښکاري چې د خپلې مسحې وروستي پړاؤ ته رسېدلي دي.
په تېرو څلورو میاشتو کې د شر او فساد ډلې په خپلو منځونو کې د یو او بل پر وړاندې داسې حالت ته ښکته شوي دي، چې اوس د یو او بل خیانتونه او د غرب څخه نیول شوې پروژې را سپړي.
دوستم ګیلمجم او یونس قانوني چې په یوه شوری کې سره یوځای دي، خو په دې وروستیو کې د یو او بل پر وړاندې سخت اقدامات کوي، د ګفتمان په کنفرانس کې له ګډون کولو یونس قانوني د شوری د ټول غړي منعه کړي وو، خو دوستم بیا هم خپل استازی یاد کنفرانس ته ورلېږلی و.
احمد مسعود چې د مقاومت د خیالي جبهې جوړښت یې د پیسو د پیدا کولو او راټولولو لپاره کړی دی، تازه ورسره ډېری ملګري د پیسو پر سر وران شوي، چې په میډیا کې یې ورپسې هغه معلومات خپاره کړل، چې لوستل یې انسان عجیب حالت ته وړي.
نصرت اقبال چې د شر او فساد د مقاومت خیالي جبهې نږدې او مخکښ غړی بلل کېږي، د احمد مسعود له ډېرو رازونو پرده پورته کړې؛ هغه په خپل ایکس پاڼه لیکي چې: “احمد مسعود د بهرنیو څخه د اخیستل شویو پیسو مسؤلیت د بسم الله محمدي ورونو ته سپارلی، چې هغوی په یادو پیسو کې له جنګیالیو هم خپله برخه پیسې وهي”.
نوموړی زیاتوي:”د مقاومت خیالي جبهې له پاڼو ټول خپاره کېدونکي خبرونه درواغ دي” او پوښتنه کوي، چې “آیا د مقاومت د خیالي جبهې د بریدونو خبر له ځان او د دوی له جعلي ویب پاڼو پرته بل چا تایید کړی دی؟ آیا یو هیوادوال لیکلي چې هغه چیرته د چاودنې غږ اورېدلی؟ آیا د مقاومت له جبهې پرته کومې سرچینې دا خبر تایید کړی دی؟”.
همدا غلا او درواغجن تبلیغات د دې لامل شوي، چې د ځمکې پر مخ د بُغاتو ډله له سخت او چټک غبرګون سره مخ کړي.
د شر او فساد ډله د وطن په بربادیو روږدې وه/ده، چې اوس یې دا اعتیاد په ذهني ناروغۍ بدل شوی دی او داسې ښکاري چې وجود یې دوه پړقه او له منځه لاړ او د احمدشاه مسعود د شر او فساد دا ډله چې وطن یې تر ننې ورځې د اور پر سر نېولی؛ خنثی شي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.
