ليکوال: عبدالله زاهد
په دې وروستیو کې د شر او فساد ډلې يو خبر خپور کړ چې پکې يې افغانستان کې د ا.ا.ا ضد په ۱۲ دوولسو ولايتونو کې د څلوېښتو ۴۰ نظامي عملياتو ادعا کړې وه.
د دوی دغه دروغجنه دعوه يواځې د پوچو تبليغاتو يوه هڅه ده؛ ټول ولس او نړۍ ته څرګنده ده چې په ټول افغانستان کې سرتاسري امن دی او داسي هيڅ نظامي عمليات د شر او فساد ډلې له خوا نه دي شوي؛ نه هم د شر او فساد ډله په افغانستان کې خلک لري چې دوی ته دې نظامي عمليات ترسره کړي.
د شر او فساد ډله له بهر هېوادونو څخه يواځې دروغجنې نعرې او دعوې کوي نو عمليات به افغانستان کې څوک ورته کوي؟ که کله د پيسو يا د تعصب له وسيلې په کار اخيستنې کوم افغان ځوان تيرباسي هم ډېر ژر د ا.ا.ا د ځواکونو له خوا ونيول شي.
د شر او فساد ډلې مقاومت يواځې تر سوشل ميډيا پوري محدود دی؛ ټول افغانان ښه پوهېږي چې دا يواځې فېسبوکي مقاومت دی؛ چې پر مخ د ځمکې هيڅ حقيقت نه لري او نه هم په دوی کې دومره توان شته چې د ا.ا.ا ضد نظامي عمليات ترسره کړي.
دوی ټول په خارج کې ناست دي او له هغه ځايه د دروغو تبليغات، بې ځايه ادعاوې او له بهرنيانو څخه د مقاومت په نامه د مرستې او ډالرو غوښتنې کوي.
دغه وجه ده چې د نړۍ استخبارات خاص مرسته نه ورسره کوي؛ دا ځکه د نړۍ استخباراتي کړۍ پوهېږي چې د شر او فساد ډلې مقاومت يواځې تر سوشل ميډيا پوري محدود او خيالي تبليغاتو، ادعاوو ته ناست دي؛ هغوی پوهېږي چې د شر او فساد ډله دغه دروغجنې او بې ځايه ادعاوې له نړۍ څخه د ډالرو اخيستلو په پار کوي.
د دوی د دغو پوچو تبليغاتو يوه وجه هم بيرته همدا نړيوال دي، دوی غواړي په دغسي دروغجنو او پوچو تبليغاتو سره ا.ا.ا بد وښيي؛ دا ځکه چې له تيرو دريو کلونو څخه دوی نړيوالو ته د بياځلي يرغل زارۍ کوي چې راشئ او پر افغانستان يرغل وکړئ!
دوی لا هماغه خوبونه د بياځلي يرغل ويني خو نړيوالو درک کړې چې ا.ا.ا د افغانانو له منځه راپورته شوی او ټول ولس ورسره ولاړ دی؛ نړيوال پوهېږي چې هيڅکله به د ا.ا.ا مقابل دوی بريالي نه شي؛ دا ځکه شل کاله دلته جګړه وشوه، افغانانو قربانۍ ورکړې او د نړۍ د سوپر طاقتونو سره وجنګېدل؛ خو په دې دوو لسيزو جګړو کې چې د غرب او ناټو مقابل وه بيا هم طالبان نه ختم، نه کمزوري او نه هم ستړي شول؛ بلکې لا هم ورځ تر بلې پر ډيرېدو وو.
نړۍ د تير جمهوريت او دغه د شر او فساد ډلې سره شل کلونه ولاړه وه؛ پيسه، وسله او هر څه يې ورکول؛ طيارې به يې پر سر ګرځېدې، بمبار او وحشتونه يې د افغانانو او ا.ا.ا ضد کول؛ خو بيا هم دوی په ګډه ونه توانېدل چې طالبان ختم يا ترې په نظامي ډګر کې جګړه وګټي نو اوس به يو څو تعصبګر، لنډغر څه وکولای شي!
بل طرف ټولې نړۍ د ا.ا.ا ضد دوې لسيزې پوچ تبليغات وکړل؛ د بدنامولو هڅې يې وکړې خو بيا هم ونه توانېدل چې په نظامي ډګر کې يا هم په سياسي ډګر کې طالبانو ته ماتې ورکړې؛ نو اوس به دغه د شر و فساد ډله په څو فېسبوکي صفحو او ټويټر اکونټونو سره څه وکړي! دا صرف يو ناکامه او بې ځايه هڅه ده نور هيڅ هم نه.
نړۍ پوهېږي چې افغانان نور جګړه نه غواړي، افغانان امن او سولې کې ژوند کول غواړي او که ترې دغه امن واخلو نو موږ به هم خطر کې يو ځکه يې دوی ته د مطلق «نه» ځواب ويلی؛ ورته يې ويلي چې موږ بيا هيڅکله پر افغانستان حمله نه کوو.
خو دا چې د شر او فساد ډلې او د تير جمهوريت مشرانو کاروبار د افغان ولس په وينه تجارت وو خو له دې تجارت څخه ا.ا.ا خلاص کړل ځکه بيا هم زارۍ کوي؛ د ا.ا.ا بدنامه کولو ناکامه هڅې او پوچو تبليغاتو ته يې اوږه ورکړې؛ دوی هڅه کوي په دغسي دروغجنو او بې ځايه ادعاوو سره ا.ا.ا نړۍ ته کمزوری وښيي خو نړۍ ته د طالبانو زور ښه معلوم شوی.
د شر او فساد ډلې يو څو لنډغر دي چې په بهر هېوادونو کې ناست او يواځې يې مقاومت تر سوشل ميډيا پوري محدود دی؛ کوم چې په اصل کې د ځمکې پر مخ داسي هيڅ هم نه لري؛ نه خلک لري، نه يوه لوېشت ځمکه چې دوی پکې تم شي نو نظامي عمليات به څنګه ترسره کوي؟
ولسه!
د دغه شر او فساد ډلې په دروغجنو او بې ځايه ادعاوو باک مه کوئ! دوی ته ستاسو دغه امن او سولې کې ژوندون د زغملو نه دی؛ د دوی فېسبوکي مقاومت يواځې تر سوشل ميډيا پوري محدود دی او ډېر ژر به له دې فېسبوکي مقاومت څخه هم لاس واخلي؛ که تاسو (افغان ولس) دغسي په يوه اتحاد او تر يوه محمدي بيرغ لاندي ژوند د ځانو لپاره غوره کړی وو.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.
