پاکستاني مشهور تاريخ پوهان او سياسي مبصرين همدا يوه خبره کوي چې د پاکستان نظام او حکومت اګر که په انتخاباتو هم راغلی وي هغه پوځ کنټرولوي او په هر څه پوځ واکمن وي.
پاکستان په تاريخ کې دوه داسې ولسمشران چې پوځيان وو ډير بد نوم لري يو يې جنرال مشرف بل یې جنرال يحيی خان ؤ؛ جنرال يحيی چې په خټه قزلباش ؤ د جنرال ايوب له استعفا وروسته یې د پاکستان د حکومت چارې په خپل لاس کې واخستلې.
کله چې په ۱۹۷۱ کې د دسمبر په ۱۶مه بنګلديش سقوط وکړ، نو په ټول پاکستان کې د پوځ پر ضد لاريونونه شروع شول، په ۲۰ دسمبر جنرال يحیی خان مجبور شو تر څو استعفا ورکړي او حکومت ذوالفقار علي بوټو ته وسپاري.
په ۲۸ د دسمبر د پاکستان حکومت د بنګلديش د سقوط د لاملونو د پلټنې په خاطر يو کميشن جوړ کړ چې په هغه کميشن کې د پاکستان د هغه وخت مشهور قاضيان او څه جنرالانو هم برخه اخيستې وه.
د دغه کميشن مشر د هغه وخت د سترې محکمې قاضي القضات حمود الرحمن مشر وټاکه؛ موده وروسته د دغه کميشن يو څېړنيز راپور خپور شو چې په هغې کې یې د بنګلديش د سقوط څو لاملونه ياد کړي وو او په هغه لاملونو کې څو د جنرال يحيی خان د شخصې ژونه اړوند وو.
په هغه راپور کې راغلي وو: بنګلدیش ځکه سقوط وکړ چې: جنرال يحيی خان په ځای د دې چې د هيواد سياسي، دفاعي او اقتصادي حالات وڅاري همیش به په شرابو کې ډوب وو؛ راپور وړاندې ليکلي چې جنرال يحيی خان د مشهورې پاکستانۍ سندر غاړې نور جهان سربېره د ۵۰۰ نورو ښځو سره هم جنسي اړيکې درلودلې.
هغه يوه ښځينه ياره درلودله چې عقيل اختر نومېده خو هغه په جنرل راني مشهوره وه، تر ننه همدا تأثر دی چې دغه ښځې اصلا د پاکستان حکومت چلوه او یحیی خان به هميش د هغې سره د شرابو په نشه کې ډوب پروت و.
د پاکستاني، هندي، بنګالي او اروپايي مورخينو، سياسيونو او مشهورو ليکوالانو نظر دا دی چې د جنرال يحيی خان دوره د نوي پاکستان په تاريخ کې اولنی بدنامه، قاتله، له ويرې، وحشت او ظلم ډکه دوره وه.
د همده په وخت او حکومت کې بنګلديش ازاد شو، پاکستاني پوځيانو په ميلونونو بنګالي مسلمانان قتل عام او په لکونو انجونو يې جنسي تېري وکړل.
کله چې په ۱۹۷۰ کې په پاکستان کې انتخابات وشول نو د بنګلدیش د عوامي ليک مشر شيخ مجيب الرحمن رايې وګټلې خو هغه وخت په بنګلدیش کې په وظيفه ميشت يو مهم جنرال ويلي وو: مه خفه کيږئ موږ به دا تور بنګاليانو ته هيڅ وخت اجازه ورنکړو چې پر موږ حکومت وکړي.
The Making of Terrorism in Pakistan: Historical and social roots of extremism.By: Eamon Murphy 2012
همدا لامل و چې بنګاليان او بنګالي سياسيون پوه شول چې له پاکستاني پوځ سره ګذاره سخته ده او هغوی د ازادۍ او خپل حق غوښتلو لپاره لاس په کار شول.
د پاکستان د هغه وخت ولسمشر پوځي ديکتاتور جنرال يحيی خان په بنګالي سياسي ګوند عوامي ليګ بنديز ولګوه؛ د پاکستان حکومت او پوځ په بنګلديش کې د (اپريشن سرچ لايټ) په نوم پوځي عمليات شروع کړل؛ د دغه عملياتو مشر جنرال ټيکا خان ؤ چې وروسته ورته بنګاليانو د بنګال قصاب لقب ورکړ.
The traitors of Pakistan By: Nachiketa GotamPress & Publication Agency; distributors: Central News Agency]
پاکستاني پوځ په دغه پوځي عملياتو کې تر ۳ میليونه بنګاليان قتل عام کړل چې په هغوی کې واړه ماشومان، ښځې، سپين ږيري او ځوانان شامل وو؛ تر لس ميلونه ډير بنګاليان هند ته په هجرت کولو مجبور شول؛ په بنګلديش کې په ميشتو له ۲ لکو څخه واخله تر ۴ لکو مسلمانو او هندوانو ښځو باندې پاکستاني پوځ جنسي تېري وکړل.
War as history, humanity in violence: Women, men and memories of 1971, East Pakistan/BangladeshBy: Yasmin Saikia,
د بنګلديش حکومت هغه وخت ويلي وو چې پاکستاني پوځ په ۲ لکه ښځو جنسي تیری کړی خو اسټرالوي ډاکټر او د حمل د لرې کولو ماهر جيوفيري ډيوس ويلي د بنګلدیش حکومت ښودلی راپور غلط دی او دا عدد له ۴ لکو لوړ دی.
Mass rape and the inscription of gendered and racial domination during the Bangladesh War of 1971Mookherjee, Nayanika (2012
پورته ياد شوی ډاکټر بنګلديش ته هغه وخت تللی وو او ليدلی حالت يې بيان کړی، هغه وايي له ۵ زرو ډيرو ښځو خپله حمل ضايع کړی.حواله: هماغه پورته کتاب.خو پاکستان حکومت او پوځ یې بيا د دغه جنسي تېري اندازه له زرو کمه ښيي.
Commission inquiry 1971.By: Hamdoour rahman.
د دغه جنسي تيري په اړه د بنګلديش حکومت وايي چې: د پاکستاني پوځيانو لخوا په بنګالي ښځو د دغه جنسي تېري له امله ۷۵۰۰۰ ښځو حمل اخيستی وو.
The Bangladesh genocide: The plight of women.Angela Debnath (2009).
څېړنې ښيې چې د دغه جنسي تېري له امله یو لک او ۷۱ زره ښځو او انجونو خپل حمل ضايع کړی وو او تقريبا ۳۰ زره ماشومان د دغه حمل له امله زېږېدلي وو.
Gendered nation, gendered peace: A study of Bangladesh.Mohsin, Amena
داسې ډيری څېړنيز راپورنه شته چې په سلګونو مسلمانو او هندوانو انجونو په خپلو ويښتانو ځانونه زندۍ کړي وو؛ داسې راپورنه هم شته چې وروسته بيا ډېري انجوني زنا کولو ته محبوره کړل شوې وې.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.
