د نورستان ولایت په کامدېش ولسوالۍ کې له ډېورنډ فرضي کرښې څخه د شر او فساد، داعش او پاکستانیو ملېشو د ګډې ډلې را اوښتل او د هغوی نابودېدل دا حقیقت روښانه کړ، چې د افغانستان بهرني او داخلي دښمنان له هېڅ ډول جنایت او دسیسې څخه ډډه نه کوي. دغو شومو تحرکاتو وښودله چې شریر عناصر او د سیمې استخباراتي مهرې پر يوه شریر مېز یو ځای شوي دي، ترڅو اسلامي نظام، امن، ثبات او ځمکنۍ بشپړتیا وننګوي.
پاکستانۍ ملېشې، داعش ډله او د شر او فساد غړي د ګډ مثلث په توګه د ګران افغانستان او شريفو افغانانو مشترک او قسم خوړلي دښمنان دي. دغه مثلث ثابته کړې چې هدف یې یوازې او یوازې زموږ په پاکه خاوره کې د بې ثباتۍ، وېرې او ګډوډۍ خپرول دي. دوی د خپلو بهرنیو بادارانو په دستور غواړي افغان ملت په خپلو وینو کې ولمبوي او د دې وطن د پرمختګ او سوکالۍ شته هیلې له خاورو سره خاورې کړي.
د دې خبیث مثلث په سترګو کې له شر او فساده پاک افغانستان، اسلامي نظام، ډاډمن امنیت او رامنځ ته شوی ثبات اغزی دی. دوی نه شي زغملای چې افغانان د پردیو له لاسوهنو خلاص، په امن او خپلواکۍ کې ژوند وکړی؛ همدا ده چې پاکستانی پوځي رژیم يو خوا پر ملکي اهدافو بې موجبه بريدونه کوي او بل خوا د شریرو ډلو او داعشي فتنه ګرو په تسلیح، تمویل او ملاتړ سره غواړي پر کرښه پرتې سیمې ناامنه کړي او د یوې بلې جګړې اور افغانستان ته راوړي.
په نورستان کې د ځانګړو ځواکونو پر وخت، مېړني او پرېکنده اقدام هم وښودل چې د دې خاورې رښتيني ساتونکي او د رباط اتلان د اسلام له مقدساتو، خپلې خاورې او مؤمنو افغانانو څخه دفاع ته هره شېبه چمتو دي. د دښمن د لسګونو کسانو مرګژوبله او د پاتې شونو تسليمي د پوځي رژیم او نورو شریرو عناصرو د ذلت، رسوایۍ او ماتې ژوندی ثبوت دی. مخالفين که هر څومره تجهيز وي او د يو شریر ګاونډي له روزنې او تجهیز برخمن وي، بيا به هم د مؤمنو او مجاهدو افغانانو په وړاندې په ګونډو کېږي.
د افغانستان د باغيرته، مؤمن او مجاهد ملت په توګه دا زموږ شرعي او ملي مسؤلیت دی، چې د دغو مشترکو دښمنانو د شومو دسیسو پر وړاندې په بشپړې هوښیارۍ، یووالي، ځواک ودرېږو. باید پرېنږدو چې پردي استخبارات او د هغوی ګوډاګیان زموږ پاکه خاوره په خپلو ناولو قدمونو ناآرامه کړي. افغان ملت هیڅکله غلامۍ او د پردیو تورې ته سر نه دی ټیټ کړی او نه به یې ټیټ کړي.