مولوي ذبيح الله مجاهد ويلي، چې د مشرتابه د حکم پر اساس په یو شمېر وزارتونو، خپلواکو ادارو او قضايي او علمي بنسټونو کې نوې ګمارنې او اداري بدلونونه ترسره شوي.
د دغو ټاکنو له مخې، مولوي محمد ګل صیاد د سترې محکمې نظامي مرستیال، شیخ سردار محمد ابوالفیضان د مرکزي دارالافتاء عمومي رئیس او شیخ خیرجان خیرخواه د امر بالمعروف، نهي عن المنکر او شکایتونو اورېدلو وزارت د نظامي معین ټاکل شوی.
همدارنګه، د مالیې وزارت، معدنونو او پټرولیم وزارت، ښاروالیو چارو، سترې محکمې، کندهار ولایت، پکتیکا پوهنتون او د نفت او ګاز اړوند ادارو په ګډون په بېلابېلو دولتي بنسټونو کې د معینانو، رئیسانو، مرستیالانو او قاضیانو په کچه یو شمېر نور اداري بدلونونه هم رامنځته شوي.
د نوو ګومارنو له مخې، حاجي نعمت الله حسن د مالیې وزارت د عوایدو او ګمرکاتو معین، مولوي محمد اسحاق صاحبزاده د معدنونو وزارت د مالي او اداري معین، مولوي عبدالمتین سعید د همدې وزارت د جیولوجي سروې معین او مولوي محمود شاه زاهد د معدنونو وزارت د تخنیکي معین په توګه ګمارل شوي.
همداراز، مولوي سیف الدین تائب د کندهار ولایت د مرستیال والي، مولوي روزي خان شیباني د پکتیکا پوهنتون د رئیس، ملا عزیزالرحمن شریف د معدنونو وزارت د نفت او ګاز عملیاتي شرکت د رئیس او ملا محمد صادق انقلابي د معدنونو وزارت د معدنونو د محافظت د رئیس په توګه غوره شوي.
دغه راز، د مرکزي دارالافتاء، دارالانشاء، نظامي محکمو او د کندهار ولایت د فرمانونو او حکمونو د تعقیب او نظارت په ادارو کې هم یو شمېر نوي مسؤلین او مرستیالان ټاکل شوي دي.