د افغان حکومت وياند، مولوي ذبیح الله مجاهد وايي، چې د مشرتابه د ځانګړي حکم پر اساس په يو شمېر وزارتونو او ادارو کې د لوړې کچې ټاکنې ترسره شوي دي.
د ښاغلي مجاهد په وينا، د دفاع وزارت د ټکنالوژۍ او لوژستیک مخکنی معین ملا عبدﷲ بشیر، د معیار او کیفیت ادارې د عمومي رئیس په توګه او د سرحدونو او قبایلو چارو وزارت د جرګو، اقوامو او قبایلو د همغږۍ مخکنی معین مولوي محمد علي جان، د دفاع وزارت د ټکنالوژۍ او لوژستیک معین په توګه ټاکل شوي.
دغه راز د سرحدي پولیسو مخکنی عمومي رئیس مولوي حزب ﷲ افغان، د ارشد معینیت د رئیس ارکان په توګه او د ارشد معینیت مخکنی رئیس ارکان ملا عبدالرحیم احمد د سرحدي پولیسو عمومي رئیس په توګه ټاکل شوي او پر دې سربېره د معیار او کیفیت ادارې مخکنی عمومي رئیس ملا فیض ﷲ تمیم د زابل ولایت د مرستیال په توګه وټاکل شوی.