له ارګ څخه خپره شوې خبرپاڼه کې راغلي، چې کندهار کې د افغان حکومت د مشرتابه په مشرۍ د وزیرانو شورا غونډه ترسره شوې ده.
سرچينې ويلي، دې غونډه کې مشرتابه د کابينې وزیرانو ته د خپلو مسؤلیتونو د ښه ترسره کولو، د شرعي نظام او اسلامي امارت د فرمانونو د اغېزناک تطبیق، له خلکو سره د عدل او د هغوی د ستونزو د حل په اړه لازمې سپارښتنې کړي.
نوموړي د دیني زده کړو، تقوا، اخلاص او خلکو ته د دیني پوهاوي پر رسولو هم ټینګار کړی او په وينا یې چې د اسلامي نظام پیاوړتیا د دیني علم او صحیح عقیدې په خپرولو سره رامنځته کېږي.
د غونډې پر مهال د هېواد د تعلیمي، اقتصادي او سیاسي چارو د لا پیاوړتیا لپاره یو شمېر مهم تصمیمونه هم نیول شوي دي.
پر دې سربېره د پخوانیو شوراګانو د پرېکړو د تطبیق بهیر ارزول شوی او اړوندو مسؤلینو د خپلو ترسره شویو اجراتو په اړه معلومات وړاندې کړي دي.
په پای کې د اداري، اقتصادي او ټولنیزو موضوعاتو په اړه نظرونو تبادله شوي او غونډه د مشرتابه په دعا سره پای ته رسېدلې.