رویټرز راپور ورکړی چې منځني ختیځ کې د کړکېچونو له زیاتېدو او د تېلو د نړیوالې عرضې د کمېدو له اندېښنو سره د برنټ خامو تېلو بیه له درې سلنې ډېره لوړه شوې او د یوه بېرل بیه شاوخوا ۱۰۷.۸۱ ډالرو ته رسېدلې ده. دغه راز د امریکا د «وېسټ ټکساس انټرمیډېټ» (WTI) خامو تېلو بیه هم نږدې درې سلنه لوړه شوې او له ۱۰۲.۶۸ ډالرو اوښتې ده.
د رویټرز په وینا، د سعودي عربستان پر مهمې ختیځ ـ لویدیځې نفتوړونکې نللیکې د بېپیلوټه الوتکو برید او د هرمز تنګي له لارې د تېلو د لېږد دوامدارې ستونزې د بازار اندېښنې زیاتې کړې دي.
رویټرز وايي، که د سعودي نللیکه ژر فعاله نه شي، ینبع بندر کې د تېلو موجودې زېرمې یوازې د شاوخوا پنځو تر اووه ورځو صادراتو لپاره بسنه کوي، له دې وروسته د نړیوالو تېلو د عرضې تر څلور سلنې پورې د له منځه تلو خطر شته.
د تېلو بیه په تېره یوه اوونۍ کې شاوخوا ۸ سلنه لوړه شوې او د جولای له میاشتې وروسته د لومړي ځل لپاره له ۱۰۰ ډالرو اوښتې ده.