د پاکستاني طالبانو غورځنګ پر خپل نشراتي ادرس (عمر میډیا) د روان میلادي کال د تېرې اګست مياشتې بريدونو تفصیلي راپور په خپرولو سره ويلي، چې ځواکونو یې تېره مياشت په ۵۵۶ بريدونو کې د پاکستان حکومت بېلابېلو ادارو ۵۴۴ کسان وژلي، ۹۳۰ یې ټپيان کړي او ۱۲ نور یې ژوندي نيولي دي.
په راپور کې راغلي، چې تېره میاشت پاکستاني طالبانو تر ټولو ډېر ۱۴۱ بريدونه په جنوبي وزيرستان، ۷۱ په شمالي وزيرستان، ۶۳ په خيبر او ۵۷ باجوړ ولايتونو کې ترسره کړي دي.
د پاکستاني طالبانو غورځنګ زیاته کړې، چې په دغو بريدونو کې ليزري وسلې، لاسي بمونه، هدفي، يرغليز او ځوابي بريدونه شامل دي.
د معلوماتو له مخې، په دغو بريدونو کې پاکستاني طالبانو د پوځ او پوليسو ۵۵ نقلیه وسایطو، ۷۸ امنیتي کامرو تخریب سربېره ګڼ شمېر تأسيسات ويجاړ کړي دي.