پاکستاني طالبانو د يوې اعلاميې په خپرولو سره ويلي، چې پاکستاني پوځ د مهمو موضوعاتو څخه د پام اړولو، په سياسي او ملکي چارو کې خپلې مداخلې ته د دوام ورکولو، په غيرو اړوندو امورو کې لاسوهنې ته د جواز جوړولو او همداراز د خپلې ناکامۍ پټولو لپاره هره ورځ نوې ډرامې او د هېواد د ویجاړۍ لپاره شوم پلانونه جوړوي او په همدې لړ کې غواړي په پښتونخوا کې د امن لښکر جوړولو پر مټ کورنۍ جګړه په لاره واچوي.
اعلاميه کې همدا راز له قومي مشرانو او مذهبي او سياسي شخصيتونو څخه غوښتنه شوي، چې د پوځ له لوري د امن لښکرو جوړولو مخه ونيسي او د پاکستاني حکومت په دې شومه لوبه او ډالري جګړه کې برخه وانخلي.
پاکستاني طالبانو همدا راز زياته کړې چې دوی ته رسېدلي راپورونه ښيي، چې د امن لښکرو په نوم پوځي لوبه اوس د خیبر پښتونخوا په مختلفو سیمو لکي مروت، کرک، خیبر اېجنسي او په ځانګړې توګه په زخهخېلو کې په لاره اچول کېږي.
په اعلاميه کې همدا راز پاکستاني ولس ته د پوځ د غلطو سیاستونو او ناکاميو په اړه ويل شوي او د پاکستان د تباهۍ اصلي لامل ښودل شوی دی.