د پنجشېر ولايت مقام رسنيز دفتر وايي، د دې ولايت والي حافظ محمد آغا حکیم د پریان ولسوالۍ د نودانک، کوجان او ده پریان کلیو له یو شمېر اوسېدونکو سره په کتنه کې د هغوی ستونزې اورېدلي او ډاډ یې ورکړ چې ولایتي اداره هڅه کوي څو پرمختيايي پروژې په ټولو ولسوالیو کې په مساوي ډول پلې کړي.
نوموړي ټینګار کړی، چې هېچاته به د نظام ضد فعالیت اجازه ورنکړل شي او په وينا یې د دښمنانو شومې دسیسې به د ولس په هوښیارۍ سره ناکامې او شنډې شي.
ښاغلي حکیم په خپلو خبرو کې مخالفو جبهو او ډلو ټپلو ته په اشارې ويلي، چې دې کسانو له تېرو څلوېښتو کلونو راهیسې د خلکو پر سر تجارت کړی او اوس هم غواړي له ځوانانو څخه د پردیو په اشاره ناوړه ګټه پورته کړي.
په پای کې د پریان ولسوالۍ اوسېدونکو له اسلامي نظام څخه خپل ملاتړ اعلان کړی او د سیمې د امنیت او پرمختګ په برخه کې یې د پوره همکارۍ ژمنه کړې ده.