لیکوال: انجنیر عبدالواسع سالار
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.
غربيان د غریبو هېوادونو یا کمزورو هېوادونو بدمستان تر پارلمانونو را ولي، او په تالار کې ورته دومره چکچکې وهل کېږي چې احمق متکلم په ځان پورې حیران کړي.
د غربیانو چکچکې بې څه نه وي؛ هغه د دریمې نړۍ هېوادونو لیونیو پورې استهزاء کوي خو دا لیوني احمقان نه پرې پوهېږي.
احمدمسعود د امریکا، فرانسې او اروپا پارلمان کې د چکچکو په دوړو کې ورک شو، نوموړي ته به یو ډول غرور درېده چې ګواکی په دوی کې یو برجسته سیاستوال، عالم، دانا او زړور سړی زه یم.
نخیر: له تا پخوا یوځل یې ستا پلار هم د فرانسې د پارلمان په تالار کې بدرګه کاوه همداسې لېونۍ چکچکې هغه ته هم ووهل شوې بیا یې سلاح ګانې ور په شا کړې او افغانستان ته یې را ولېږه، د پارلمان د چکچکو په غبار کې ورک احمد شاه مسعود په افغانستان کې د باروتو په لمبو او لوګي کې خپل ولس لولپه کړ.
کال دوه وړاندې یې د یوکراین ولسمشر ولادیمیر زیلنسکي یې هم راوست او ښه په چکچکو د امریکې کانګرس کې بدرګه شو، هغه لکه فاتح سټیج ته ودرېده، امریکا په شا وډباوه ورته یې وویل چې روسان ماتېږي او دا به ستاسو مېړانه ماتوي؛ بیا به امریکایي سیاستوالو د سترګو کونجونو کې سره وخندل، خو زیلنسکي نه پوهېده چې دلته یې حیثیت څومره وو؟
امریکایانو به د زیلنسکي مقاومت ستایه بیا به یې اشرف غني وښوده چې زیلنسکي ترې تکړه دی او غني یو فراري انسان ووت؛ ده باید مقاومت کړی وای لکه زیلنسکي باید مقاومت ته راوتلی وای.
څو میاشتې وړاندې یې زیلنسکي ته وویل چې له روسانو سره روغه وکړه او خپلې ستونزې خپله هوارې کړه، موږ نه مرسته درکولی شو نه مو ملاتړ کولی شو.
امریکا اوکراین پرې خاورو سره برابره کړه او هلته یې روسان له اقتصادي او بشري زیان سره مخ کړه، روسانو مالي او ځاني تاوانونه ولیدل خو په پای کې یې اوکراین په اوبو ګډ کړ او خپله د خیر په غونډۍ کښېناسته؛ زیلنسکي به اوس ځان او اوکراین څه ډول له دې توپاني اوبو راباسي دا به وخت ثابته کړي.
امریکایان د نیمې لارې ملګري هم نه کوي؛ د احمد مسعود مطالعه او تجربه ډېره خامه ده، د احمد مسعود پلار یې هم روسانو ته یوازې پرېښی و، روسان یې افغانستان کې ښکیګېل کړل کله چې افغانان ټوک ټوک شول امریکا افغانستان او هغو مجاهدینو ته شا کړه چې مخکې یې ډالر او سټنګر ورکول.
امریکا درې لسیزې افغانستان ته شا کړه مګر په نولسم د سپتمبر یې بهانه راجوړه کړه او په افغانستان یې د زمکې او هوا له لارې بریدونه وکړل او افغانستان یې اشغال کړ.
احمد مسعود ته به ډېر ژر عقل سر ته وخېږي چې امریکایان یې لکه زیلنسکي په اوبو ګډ کړي بیا ترې لاړ شي، نو مسعود ته به افغانان وایي: د کونډې زویه اوس وهه د ډاګ مزلونه!
