د پاکستاني مرکزي څېړنیزه اداره وايي، د کراچۍ په هوايي ډگر کې یې ۱۱ هغه کسان نیولي دي، چې سعودي عربستان ته د خیرات غوښتلو لپاره تلل.
یادې ادارې ویلي، له نیول شوو کسانو سره د بېرته راتگ ټیکټونه جعلي وو او په لومړیو پلټنو کې معلومه شوې چې یاد کسان د خیرات غوښتلو لپاره تلل؛ خو پلمه یې د عمرې اداء کول ښودلي.
د څېړنیزې ادارې د راپور له مخې، د عمرې په نوم سعودي عربستان ته د خیرات غوښتونکي ۱۱ تنه یې د کراچۍ په هوايي ډگر کې له الوتکې ښکته کړي، چې ۳ درې یې نارینه او ۸ یې ښځې دي.
د راپور له مخې، ټول نیول شوي کسان د پنجاب صوبې اوسېدونکي دي او یاد کسان یې د بشري قاچاق ضد څانگې ته د نورو پلټنو لپاره لېږدولي دي.
په پاکستان کې عمومي فقر او بېکاري هغه لاملونه دي، چې وگړي یې مجبورېږي چې خلیجي هېوادونو ته د خیرات غوښتو لپاره ولاړ شي.
د سعودي عربستان سربېره پاکستاني وگړي متحده عربي اماراتو، اردن، عمان، کویټ او قطر ته هم د سوال او خیرات غوښتو لپاره ځي.
پرون ډان ورځپاڼې لیکلي وو، چې خلیجي هېوادونو ته د خیرات غوښتونکو پاکستاني وگړو شمېره ډېره شوې، چې ډېری یې سعودي عربستان، متحده عربي اماراتو، عراق، ایران، عمان او ترکي ته د سیاحت لپاره ځي؛ خو هلته بیا سوال کوي او په خیرات پیسې راټولوي.
په تېرو دوو کلونو کې د پاکستان په بېلابېلو هوايي ډگرو کې ۴۴۰۰۰ زره کسان نیول شوي، چې بهر ته د خیرات غوښتلو لپاره تلل.
