د صنعت او سوداگرۍ وزارت وايي، په تېرو پینځو میاشتو کې بهر ته د اووه نیم مېلیون ډالرو په ارزښت غالۍ بهر ته صادرې شوې دي.
د یاد وزارت ویاند عبدالسلام جواد وايي، افغاني غالۍ امریکا، هند، پاکستان، چین، ازبېکستان، ترکیې او اروپايي هېوادونو ته صادرې شوې دي.
د جواد په خبره، افغاني غالۍ د افغانستان په صادراتو کې مهمه ونډه لري او په بهر کې ښه بازار هم لري.: «په دې وروستیو کې د افغانستان ډېرې غالۍ د پاکستان له لوري اروپايي او امریکايي هېوادونو ته صادرېدې؛ خو اوس د افغانستان له لارې بهر ته صادرېږي.»
نوموړي له پانگهوالو وغوښتل چې د نورو برخو سربېره د غالیو په تولید کې هم پانگونه وکړي.: «که بهر مېشتي افغان پانگهوال په افغانستان کې پانگونه وکړي؛ نو د پینځو کلونو لپاره به مالیه ورته معاف وي.»
د افغانستان لاسي غالۍ د نړۍ په ټولو هېوادونو کې ښه بازار لري. له تېرو دوو لسیزو راهیسې د افغانستان غالۍ پاکستان په خپل نامه بهر ته صادرولې؛ خو اوسمهال د افغانستان غالۍ د افغانستان په نامه بهر ته صادرېږي.
د صنعت او سوداگرۍ وزارت د معلوماتو پر بنسټ، په ۱۴۰۱ل کال کې یې بهر ته د ۲۲ مېلیونه ډالرو په ارزښت غالۍ صادرې کړې وې.
د افغانستان غالۍ ډېری په شمالي ولایتونو کې اوبدل کېږي. د تېرو کلونو سروې ښيي چې په شمال کې هر کال یو مېلیون او پینځه سوه زره متره غالۍ اوبدل کېدې؛ خو اوس له ایران، ترکیې او ازبېکستان څخه وارداتي گازي غالیو د کورني تولید مخه تر یوه بریده نیولې ده.
