عدلیې وزارت د تېر یو کال په موده کې دوه سیاسي گوندونه او ۷۵ ټولنې د ناقانونه فعالیت په دلیل امنیتي ارگانونو ته ورپېژندلي دي.
له یاد وزارت څخه په خپره شوې خبرپاڼه کې ویل شوي، د عدلیې وزارت د ټولنو او ټولنيزو بنسټونو رياست په ۱۴۰۲ کال کې د هېواد په کچه د سلگونو ټولنو له فعاليت څخه نظارت او بررسي ترسره کړې ده.
د یاد نظارت او بررسۍ په پایله کې، دوه سیاسي گوندونه او د لغوه شوو ټولنیزو بنسټونو او خيریه بنسټونه په شمول ۷۵ ټولنې چې په ناقانونه بڼه او د فعاليت جواز څخه یې پرته فعاليت تر سره کاوه، مشخص شوي دي.:«یاد گوندونه او ټولنې د عدلیې وزارت له لوري تړل شوي او د هغو مسوولین اړوندو امنیتي ارگانونو ته ورپېژندل شوي دي.»
د خبرپاڼې له مخې، دغه راز د یادو بررسیو سره په پایله کې، له هغو ۱۷ خيريه بنسټونو چې په کارونو کې یې نیمگړتیاوې او خلاگانې موجودې وې او د اصولو خلاف یې کار ترسره کاوه، ژمنه اخيستل شوې چې خپل فعالیتونه له اصولو سره سم پر مخ یوسي.
په همدې کال کې ۱۹ خيريه بنسټونه هم په ټاکل شوي وخت د جواز نه تمدیدولو په دلیل د عدلیې وزارت له لوري لغوه اعلان شوي دي.
په خبرپاڼه کې ډاډ ورکړل شوی، چې د عدلیې وزارت په دوامداره توگه په یاد وزارت کې د ثبت شوو ټولنو له فعالیت څخه نظارت کوي تر څو د ناقانونه فعالیتونو مخنیوی وشي.
