د ریاستالوزراء اقتصادي مرستیال ملا عبدالغني برادر اخوند له لوري د نېلهباغ هستوګنیزې پروژې د بنسټ ډبره کېښودل شوه.
د ریاستالوزراء اقتصادي مرستیال له دفتر څخه په خپره شوې خبرپاڼه کې ویل شوي، د نیلهباغ هستوگنیزه پروژه د هېواد په ابادۍ مهم پرمختگ دی.: «د افغانستان اسلامي امارت د نورو بېخبنسټو پروژو ترڅنگ د ودانیزو پروژو د پلي کېدو په برخه کې کوټلي گامونه اخیستي، چې د نوي کابل د لومړي فاز دوهمه برخه او یو شمېر نورې پروژې یې د نمونې په ډول یادولی شو.»
په خبرپاڼه کې د ملا عبدالغني برادر له قوله ویل شوي، د افغانستان اسلامي امارت د صنعت، کرنې، برېښنا او سوداگرۍ سکټورونو ترڅنگ د ودانیزو پروژو په برخه کې هم کورنیو او بهرنیو پانگهوالو ته د پانگونې زمینه برابره کړې.
ده وویل، دغه پروژه د چین حکومت له لوري پرمخ وړل کېږي او له چین څخه یې وغوښتل چې له افغانستان سره د یو ښه گاونډي په توګه د سیمهییز اتصال غوندې مهمو مسئایلو کې هم په مشترکه او همغږې توگه کار وکړي.
ښاغلي برادر له چینايي پانگهوالو وغوښتل چې په د افغانستان په بېلابېلو برخو کې پانگونه وکړي او له شته فرصتونو څخه دې گټه واخلي، چې په دې سره به د کابل او بېجینگ ترمنځ اقتصادي او سوداگریزې اړیکې لا پراخې او پياوړې شي.
ښاغلي عبدالغني برادر اخوند د کور او ښار جوړولو وزارت او کابل ښاروالۍ څخه وغوښتل چې په پلازمېنه کابل کې د تعمیراتي چارو ستونزو ته رسېدنه وکړي او اجازه ورکړي چې ودانیز کارونه پیل شي، څو هېوادوالو ته کاري زمینه برابره او زېربنایي صنعت پرمختگ وکړي.د نېلهباغ هستوگنیزه پروژه د چین په بلاعوضه مرسته جوړېږي، چې شاوخوا ۷۱ میلیون ډالره لگښت پرې راځي.
په دغه پروژه کې ۱۴۰۰ هستوگنیز کورونه په ۵۶ بلاکونو کې په نظر کې نیول شوي، چې د کور او ښار جوړولو وزارت تر څارنې لاندې به یې د جوړېدو چارې په ۳ کلونو کې بشپړې شي.
د دې پروژې د لومړۍ برخې د کار پیلولو تړون د ۲۰۲۰ کال سپتمبر کې د افغانستان د مخکېني حکومت د ښار جوړولو وزارت او “اېم سي سي-۱۹” شرکت ترمنځ لاسلیک شوی و.
خو د دې پروژې عملي چارې د نامعلومه دلایلو له مخې تر اوسه ځنډېدلې وې.
