د عدلیې وزارت وايي، د ځمکو له غصب څخه د مخنیوي کمېسیون او د غصب شوو ځمکو د استرداد کمېسیون په خپله ناسته کې پرېکړه کړې، چې د زرگونه جریبه ځمکو په اړه به لازم تصمیم نیول کېږي.
له یاد وزارت څخه په خپره شوې خبرپاڼه کې ویل شوي، په دې ناسته کې د عدلیې وزیر عبدالحکیم شرعي، د کرنې وزیر عطاء الله عمري، د کور او ښار جوړولو وزیر حمدالله نعماني، د سرحدونو، قومونو او قبایلو وزارت مرستیال محمد اسعمیل غزنوي، د چارو ادارې عومي مشر نورالحق انور، د کابل زون د غصب شوو دولتي ځمکو قضیو ته د رسېدنې ځانگړې محکمې رئیس محمد انور مدثر، د سترې محکمې استازي عبدالصمد حقاني، د حکومت د قضایاوو عمومي رئیس احسان الله وثیق او نورو مسوولینو گډون کړی وو.: «په دې ناسته کې د ځمکو له غصب څخه د مخنیوي کمېسیون په کابل، ننگرهار، خوست، نیمروز، لغمان، جوزجان، کندوز او میدان وردگ ولایتونو کې د زرگونو جریبو ځمکو موضوعات او دوسیې بررسۍ لاندې ونیولې.»
په خبرپاڼه کې ویل شوي، په دې ناسته کې په کابل او ننگرهار کې د ځینو ښارگوټو، کډوالو لپاره د سرپناه ټاکلو موضوع او په کابل، خوست، لغمان، جوزجان، میدان وردگ او کندوز ولایتونو کې د ځینو حکومتي ځمکو په اړه هر اړخیز بحث شو.: «کمېسیون پرېکړه وکړه چې د هېواد په بېلابېلو ولایتونو کې پر حکومتي تثبیت شوو ځمکو باندې لازم پړاونو تر سره شي او هغه دوسیې هم چې زیاتې بررسۍ ایجابوي، بشپړې شي.»
د عدلیې وزارت د معلوماتو پر بنسټ، تر اوسه یې د هېواد په بېلابېلو ولایتونو کې زرگونه جریبه ځمکه له غصب څخه راگرځولې او هغه ځمکې به هم بېرته راوگرځوي، چې له تېرو څو لسیزو راهیسې غصب شوې دي.
