انادولو خبري اژانس په یوه راپور کې ویلي، چې د غزې د روغتیا وزارت خبر ورکړی، چې د روغتونونو د برېښنا تولیدوونکو جنراتورونو لپاره د سون توکو زېرمې پای ته رسېدلې او د برېښنا د پرې کېدو له امله د ناروغانو او ټپیانو ژوند له جدي خطر سره مخ دی.
د وزارت په وینا، د سون توکو کمښت د روغتونونو د حیاتي څانګو فعالیتونه له ستونزو سره مخ کړي او د طبي وسایلو د برېښنا رسونې د ګډوډېدو احتمال یې زیات کړی دی. دغه وزارت له اړوندو بنسټونو غوښتي، چې د روغتونونو لپاره سون توکي او اړینې پرزې ژر برابرې کړي.
د راپور له مخې، غزې ته د بشري مرستو، درملو او سون توکو پر لېږد محدودیتونو د روغتونونو د اړتیاوو پوره کول ستونزمن کړي دي. د ورکړل شویو شمېرو له مخې، د ۲۰۲۳ کال له اکتوبر راهیسې پر غزې د اسرائیلو په بریدونو کې تر ۷۴ زرو ډېر فلسطینیان شهیدان شوي او له ۱۷۵ زرو ډېر ټپیان شوي دي.