د قبرس بندر څخه د درېیو بېړیو کاروان د غزې پر لوري خوځېدلي، چې ۴۰۰ ټنه خوراکي او نور توکي پکې بار دي.
یوې خیریه موسسې ویلي، دغه خوراکي توکي د یو مېلیون خلکو لپاره بسنه کوي، چې پکې وریجې، اوړه، حبوبات، پروټین، سبزیجات او خورما پکې دي.
دغه موسسې ویلي، معلومه نه ده چې دغه کښتۍ به کله غزې ته ورسېږي، خو د روانې میاشتې په سر کې اسرائیلو د دوی هغه کښتۍ هم کلابنده کړې، چې ۲۰۰ ټنه خوراکي توکي پکې بار شوي وو او غزې ته روانه وه.
د حماس او اسرائیلو ترمنځ له تېرو شپږو میاشتو راهیسې خوندۍ جگړه پیل شوې، چې تردې مهاله غزه په بشپړ ډول په کنډواله بدله شوې او په سلو کې یې ۹۵ سلنه ابادي له منځه تللې ده.
ملگرو ملتونو له دې وړاندې هم ویلي وو، چې په غزه کې خلک وږي او ډېری خلک د یو وخت خواړه هم نه شي برابرولی.
ملگرو ملتونو خبرداری ورکړی و، د غزې قحطي به د سیمې وگړو لپاره تباه کوونکې پایلې ولري.
د عدالت نړیوالې محکمې تېره اوونۍ اسرائیلو ته امر کړی و، چې د غزې ځمکنۍ لارې دې پرانیزي، تر څو هلته د خوراکي توکو، اوبو، تېلو او طبي وسایلو مرستې ورورسېږي؛ خو تر اوسه اسرائیلو په دې اړه کوم اقدام نه دی کړی.
تازه د فلسطین د عامې روغتیا وزارت ویلي، د پرو سږکال د اکټوبر له اوومې تر دې مهاله د اسرائیلو په بریدونو کې ۳۲ زره او ۷۰۰ فلسطینیان شهیدان شوي او تر ۷۵ زرو ډېر ټپیان شوي دي.
د غزې په روان بمبار تر اوسه د اسلامي نړۍ ټولو هېوادونو خاموشي اختیار کړې او د غزې ۲ مېلیونه وگړي یې د اسرائیلو هر ډول وحشت ته یوازې پرې اېښې دي.