څه موده وړاندې په بلخ ولايت کې د یوې داسې ښځې عکسونه خپاره شول، چې پر شا يې وينې او ټپونه معلومېدل او ادعا یې کوله چې د ا.ا.ا د مسؤلینو لخوا بندي، شکنجه او ځورول شوې ده.
خو شمشاد تلویزیون داسې شواهد خپاره کړي دي، چې بلخ کې د یوې ښځې خارج ته د تګ په تمه، په ځینو مسؤلینو تورونه لګولي وو، خو اوس اعتراف کوي، چې هغه یوه توطیه او ډرامه وه، د خارج وعده ورسره شوې وه خو هغه کېس ورنه کړل شو او داسې کارونه یې پرې وکړل او اوس پښېمانه ده.
د یادې مېرمنې د پښېمانتیا ویډیو له رسمي ادرسونو څخه خپره شوې ده، مېړه يې هم د ا.ا.ا د چارسمبالو سپیناوی او د نه بندي کېدلو پخلی یې کوي او خپله ښځه ګرمه(ملامته) بولي.
دا چې په افغانستان کې د معرتضو مېرمنو تر شاه د چا لاس دی او کومې وعدې ورسره شوې دي، ټولې یې په بهر کې اوسېږي، د دې اعتراضاتو تر شاه همدوی ولاړې دي او له متعرضو مېرمنو سره یې د بهر ته تګ وعدې کړې وې؛ په غرب کې ناستې پروژهيي میرمنې د افغاني عزتمنو مېرمنو په عزتونو سودا کوي.
لطفاً د شر او فساد لارویانو ته وایم، چې په خپلو او پردیو ناموسونو باندې خپل عقده یي او سیاسي مخالفت مه کوئ؛ دا ډېر ذلیل او لوېدلی کار دی.
د جمهوریت په مهال یوه ډله پروژه بګیر میرمنې وې، چې د جمهوریت د ډالرو په باران کې یي د افغانستان 50% نفوس پر سر تجارت وکړ؛ د مېرمنو د حقوقو تر نامه لاندې یې د پردیو پروژې عملي کولې، اوس یې چې له خپلو بادارانو سره یوځای له دې خاورې پښې سپکې کړې دي، د نړیوالو ډونرانو په لټه کې کله یوه دروازه ټکوي، کله بله.
تازه یې د جنسیتي آپارتاید تر عنوان لاندې یوه بله لوبه پیل کړې او غواړي له دې لارې یو ځل بیا د خلکو په سترګو کې خاورې واچوي او نړیوالو ته د اسلامي نظام تر حاکمیت لاندې ښځې مظلومې ښکاره کړي.
خو د اسلامي امارت زعیم په لومړیو کې لا د مېرمنو د شرعي حقوقو په اړه فرمان صادر کړی دی، چې له مخې یې ښځې کولای شي د میراث حق ترلاسه کړي، په نکاح کولو کې له اجبار وساتل شي، په بدو کې له ورکولو وساتل شي او ټول شرعي حقوق ترلاسه کړي، په داسې حال کې چې جمهوریت په خپله ټوله شل کلنه دوره کې د ناوړه دودونه مخه نه ده نیولې او د شرعي حق پرځای یې غربي آزادي ورکړې وه.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.