امریکا لکه پاړوګر د افغانستان زهر خواره ماران یې کڅوړو کې کومې بلې لوبې لپاره ساتلي؛ تازه داسې ګونګسې اورېدل کېږي چې امریکا اجورتي قاتل او ملېشه قومندان دوستم ورغوښتی.
دوستم د جمهوري نظام له سقوط وروسته ترکیې ته په تېښته بریالی شو، هلته یې هم درې کاله د جبهو په تنظیم او بسیج کې خپلې هڅې وکړې مګر هرې هڅې یې له ناکامۍ کومه بله پایله نه لرله.
د افغانستان د بربادۍ لپاره یې د مقاومت عالي شورا رامنځ ته کړه چې ډېر ژر بېرته ختمه شوه؛ د دې برسېره یې محلي قوماندان (ګل محمد پهلوان) هم له ترکیې په بې عزتۍ وشړل شو.
دغه قاتل جنګ سالار تېر کال ګواښ کړی و چې د طالبانو نظام به د نظامي قوت پر مټ نسکور کړي، خو دی په دې ښه پوهېږي چې طالبان ولسي او وطني قوت دی، وطني قوت څه نرمه ډوډۍ نه ده چې هر څوک پرې شخوند ووهي.د افغانستان ولسي او ولس پلوه نظامونو لویه انګریزي امپراتورۍ را څملوله، د روسیې ښکېلاک مغروره قوت یې په ځمکه وواهه.
روسانو ته هغه مهال (ابر قدرت جهاني) خطاب کېده، آبر قدرت یې ورته ځکه ویل چې د روسانو جنګي تیارو به فضا وپوښله او سیوري به یې په ځمکه راخواره وو؛ او هغه مهال افغانانو په اسمان ستوری نه درلود او په ځمکه یې سیوری نه وو.
بس لوړ عزم، راسخه عقیده او د خدای تعالی نصرت د افغانانو هغه ځواک وو چې روسان او د هغوی مزدوران له شرمونکي ماتې وروسته تر اوسه خپل ځای ته نه دي راغلي.
د جنرال دوستم د کور څوکۍ هم یو څو خړپړ ځوانان کوي، د ده په حرام سرای کې ولاړ اسانو ته اوبه او دانه هم ورکوي؛ د دغه چریکې قوماندان وسلوالو ته عفوه وشوه او عزت ورکړل شو، که د طالبانو په ځای دومره زور او قوت دغه قوماندان سره وای څه به یې کړي وای؟ښکاره خبره ده چې موږ به د لیلې دښتې د یوې بلې غمیزې شاهدان وو، څو اسیران به یې په خپلو لاسونو قصابي کړي وای او څو ولچک شوي ځوانان به یې په سره کانتینرونو کې وریت کړي وای.
تاریخ به له چنګیز خان وروسته د دوستم خان مظالم او شقاوتونه هېر نه کړي، کوم درد چې ده د افغانستان مسلمان ملت ته ده رسولی قلم یې د لیکلو توان نه لري.
دوستم نه قوم لري او نه نسب، یو ریښې او بې هویته اجورتي قاتل دی؛ نوموړی نه مخترع و نه مکتشف، نه عالم و او نه د کمال خاوند و، یواځې د خارجیانو د ګټو لپاره یې مړي کول زده و.
د امريکا د لومړي يرغل لومړنی وژل شوی عسکر جاني مايک سپن نومېده، دی لومړنى امريکايي و چې د بلخ په قلعه جنګي کې د لاسي بم بريد په ترڅ کې ووژل شو؛ په ياد يې همدې جنګي کلا کې څلى ودان شو.
امريکايانو د ازادۍ لپاره د جګړې اتل لقب ورکړ، په څلي يې د لومړي ځل لپاره د دوستم لخوا د ګلونو ګېډۍ کېښودل شوه.
کله چې لومړنی امریکايي عسکر په افغانستان کې ووژل شو، هغه عسکر ده په ډېر قدر د بلخ ولایت دهدادي ولسوالۍ د قلعه جنګي په انګړ کې خښ کړ او هلته یې پرې زیارت جوړ کړ او ګونبزه یې پرې ودروله؛ د قبر په شناختې یې ورته ولیکل: تحفه مردم ولایت فاریاب، اولین عسکر و قربانی ازادی و دموکراسی.
دوستم یو بې سواده، نالوستی، بې تهذیبه او وحشي انسان دی چې له خون خرابۍ پرته یې په بل کار ورځ نه تېرېدله.
د وژنو برسېره به یې د خپلو خلکو عزتونه هم لوټل چې په دا اخر عمر کې یې هم د ایشچي غوندې سپین ږیري په عزت صرفه و نه کړه.
د جبهو لپاره په وطن کې هیڅ خوشبین نشته او خلک خدای جل جلاله د دوی له عذابه داسې خلاص کړل لکه څنګه چې پروردګار جل جلاله بني اسرائیل له فرعونیانو وژغورل او بیا یې بني اسرائیلو ته دا د نجات ورځ د یو نعمت په توګه داسې یاده کړه: وَإِذۡ نَجَّيۡنَٰكُم مِّنۡ ءَالِ فِرۡعَوۡنَ يَسُومُونَكُمۡ سُوٓءَ ٱلۡعَذَابِ يُذَبِّحُونَ أَبۡنَآءَكُمۡ وَيَسۡتَحۡيُونَ نِسَآءَكُمۡۚ وَفِي ذَٰلِكُم بَلَآءࣱ مِّن رَّبِّكُمۡ عَظِيمࣱ. (سورة البقره: ٤٩).ژباړه: هغه ورځ مه هېروﺉ چې فرعونیانو مو له بچیو درته سرونه غوڅول او ستاسې ښځې یې ورسره وینځې وې موږ د دوی له ظلم او وحشت نه تاسو نجات درکړ.
د افغانستان خلک د چنګیز د ادم کش له نسله خدای تعالی وژغورل، د وطن هره لورکۍ لکه ناهید د دوی د ځناورتوب څخه په امن کې شوه او موږ د خدای تعالی د دې ستر نعمت شاکران یو.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.
