یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.
پاکستان په 1947 کال د اګست په 14مه له هندوستان څخه جلا شو؛ په 1971 م کال د کورني جنګ ختیځ پاکستان (بنګله دیش) یې له تنې غوڅ شو او د یو خپلواک هېواد په توګه یې تبارز وکړ.
پاکستان له پیدایش څخه یو متنازع او جنجالي جغرافیه ده، سره له دې چې په نړۍواله کچه یې پوځ په اووم ممبر کې راځي او یوازنی اسلامي هېواد دی چې اټومي ځواک لري.
نوموړی هېواد یو واحد ملت نه لري، مختلف قومونه لکه سندیان، پنجابیان، پښتانه او بلوچان پکې مېشت دي چې پنجابیان او سندیان په خټه هندیان دي، بلوچ بېلتونپال خو له پیله د پاکستان د نوم او نښان سره دښمني لري، پښتانه هم ځانونه افغانان بولي او د لر او بر د پېوستون داعیه یې د پاکستان له پیله پر مخ وړې.
سیاسي او مذهبي ګوندونه یې هم کله کله د بحرانونو په زېږون کې لاس لري؛ د دې هېواد پوځ د زور او رعب له لارې غواړي وږي او نهر خلک لاپسې له غربته ووژني.
د دې هېواد د پوځ ځانته پالیسي ده، د حکومت عمومي قوانین د دوی د زور تابع دي، په دې ملک کې هیڅ ملکي حکومت خپله قانوني دوره نه ده بشپړه کړې، هیڅ صدراعظم یې خپل قانوني مرحله نه ده طی کړې، ټول حکومتونه یې د پوځ د کودتاه ګانو په ترڅ ړنګ شوي او په ځای یې نظامي حکومتونو تسلط موندلی.
د پوځ د پېچلي سیاست له امله هیڅوک په پوځي ادارو باور نه لري، د ذوالفقار علي بوټو له اعدام واخله د جنرال ضیا تر ترور او بینظیر بوټو تر ترور پورې په هیڅ قتل یې صرفه نه ده کړې.
له نواز شریف تر زرداري او تر عمران خان د وخت هغه صدراعظمان دي چې د پوځ له لوري د زندانونو تورو تمبو شاته اچول شوي دي.
د دوی وروستني صدراعظم عمران خان د پوځ په وړاندې قدعلم وکړ او پوځ د تاریخ په اوږدو کې یوازې له عمران خان وېره لري، ځکه عمران خان په خلکو کې په همدې محبوبیت لري چې د پوځ د رذالت او مظالمو په وړاندې ودرېده او نوموړي د استخباراتي ادارې پر تشکیلاتو کې د عزل او نصب جسارت وکړ، تل به یې په تقریرونو کې ددې هېواد پوځي قدرت ننګاوه او خپلو خلکو ته به یې ویل: له پوځي فرعونیانو وېره مه لرﺉ؛ ددې وېرې بوت مات کړﺉ چې پوځ ستاسې په زړونو کې هغه بتان درولي او دا بتان ستاسې په راپورته کېدو نړېږي.
پوځ له اول نه د عمران خان له نفوذ او نفوس څخه وېره احساسوله، هغوی دا محاسبه کړې وه چې خان قومي او سیاسي ريښې لري او له عمران خان سره ټکر به پاکستان کورني جګړې ته ټېل وهي.
د پاکستان تر پوستکي لاندې د عمران خان د پلویانو پټ انقلابي حرکت او نورو قامي او مذهبي غورځنګونو، د پاکستاني طالبانو خونړی مقاومت، د بلوڅ بېلتونپالو وسلواله مبارزه، د پي ټي ایم مدني نافرماني، د طاهرالقادری لبیک یارسوالله مذهبي ډله، خوابدي سوداګر، صنعتکاران او کاریګر چې دوی د ډېرو درنو مالیاتو، برښنا بېلونو او ګازو لګښتونو نه تر پوزې راغلي او ډېرو صعنتکارانو خپل د برښنا بېلونه وڅېرل او د اعتراض په ډول یې ازاد کشمیر، اسلام اباد، راولپنډۍ، لاهور او پېښور ښارونو کې واټونو ته را ووتل.
عام خلکو د اعتراض په ډول وچې ډوډۍ غاړو کې اچولې وې له بېکارۍ یې داد او فریاد کاوه؛ یوه د نانوایي ډوډۍ چې افغانستان کې لس افغانۍ پلورل کېږي هلته په پنځوس کلدارو پلورل کېږي؛ همدا ډول د یو بوتل وړوکي اوبو نرخ پکې پنځوس کلدارې دی، په څلوریشت ساعتونو کې 16ساعته د برښنا پارچاوي لري، سږکال د ډېرې ګرمۍ له امله پنځه سوه کسانو پکې ژوند له لاسه ورکړ.
د برښنا بیه پکې په ډرامتیک ډول شپږ اویا سلنه لوړه شوې، خلک یې د فقر د سونامي په تلاطم تر ويښتو ډوب دي؛ لرې نه ده چې د بحرانو طغیانو څپې دا هېواد په بل مخ واړوي.
