د شر او فساد اړوند «متحده جبهه» کې د تازه ناندریو او خپلمنځي اختلافاتو ترڅنګ، پاکستان ته د دغه جبهې د مشر سمیع سادات سفر او د پاکستاني پوځ د شریرې او استخباراتي کړۍ له لوري د ملاتړ او امکاناتو تر لاسه کولو په دغه ډله کې دننه پراخې نارضایتۍ راپارولې دي. دا چې د متحدې جبهې مشرانو د خپلو شخصي ګټو او هېواد ضد اهدافو لپاره د هغه هېواد پوځ ته لاس غځولی چې تل د افغانستان د تباهۍ او بې ثباتۍ په لټه کې دی، د دې ډلې د یو شمېر مهمو غړو لپاره د منلو وړ نه دی او اوس هڅه کوي چې له دغه ډلې لار بېله کړي.
دا نارضایتۍ له دې امله پیدا شوې، چې سمیع سادات له کلونو راهیسې ځان د پاکستان ضد څېره ښودلې وه، تر دې چې خپلې کاواکه ډلې ته یې هم یو شمېر پخواني نظامیان په همدې دروغجنه دښمني او جعلي شعارونو راوستي وو، خو له پاکستاني پوځي رژیم سره د نوموړي د اړیکو او ملاتړ په اړه له خبرېدو وروسته اوس ناراض شوي دي.
پاکستان ته د سمیع سادات د سفر یوه د پام وړ هدف د پخوانیو نظامیانو جذب هم و، چې د پاکستاني رژیم په مستقیمه همکارۍ او طرحه مخ ته وړل کېده. د راپورونو له مخې، یادې جبهې هڅه کوله چې په لویه کچه پخواني نظامیان دې ته وهڅوي څو د دوی په لیکو کې شامل شي، خو کله چې یادو نظامیانو ته روښانه شوه چې دغه جریان د پاکستاني پوځي رژیم په ملاتړ او د هغوی د اهدافو لپاره د عملیاتو پیلولو په تکل کې دی، نو د هغوی له منفي ځواب سره مخ شوي دي.
دا ټول هغه څه دي، چې پاکستان ته یې د سمیع سادات سفر د نوموړي د خیالي ډلې او پوځي رژیم په زیان تمام کړ او نامشروع موخې یې هم تر ډېره له لاسه ووتلې، چې په پایله کې سمیع سادات او د نوموړي نږدې کړۍ اوس په کور دننه او بهر د یوې خیالي، نامشروع او لاسپوڅې ډلې په توګه پېژندل کېږي.
سمیع سادات د دې پر ځای چې خپل اعلان شوي شعارونه عملي کړي، د پاکستانۍ کالدارو د ترلاسه کولو او پوځي تجهیز په هیله یې د اسلام آباد او راولپنډۍ دروازو ته مخه کړې ده. دا چاره به یاده ډله له ګڼو نورو ننګونو سره هم مخ کړي، چې په پای کې به له انشعابونو او زوال سره مخ کېږي او تورې څېرې به یې د پردیو اجیرانو په نوم د تاریخ په پاڼو کې ثبتېږي.


