په دې کې شک نشته چې د شر او فساد لارویان، په هر نوم چې فعالیت کوي، په افغانستان کې یې د ځان لپاره د ځای پیدا کولو لپاره له هیڅ هڅې لاس نه دی اخیستی او په دې لاره کې خپل ټول ارزښتونه د خپلو غوښتنو قرباني کوي.
د شر او فساد پخوانۍ کړنې هم په ډاګه کوي چې دې تور مخو د جمهوریت په فاسد نظام کې د خپلې بقاء لپاره له بهرنیو یرغلګرو سره ډېرې ناستې، پاستې لرلې او د هغوی د ملاتړ ترلاسه کولو په بدل کې یې هر کار ترسره کړی.
تر دې کچې چې هغه مهال د بهرنیو هېوادونو د مرستو کڅوړې له داسې غوښتنو سره مل راتلې، چې په ښکاره له اسلامي او ملي ارزښتونو او ملي ګټو سره په ټکر کې وې، له همدې بدنامو مشرانو به یې د عملي کولو تمه درلوده.
له همدې سره به د تش په نوم وطن پلورونکو مشرانو جیبونه له امریکایي ډالرو څخه ډکېدل، په افغانستان کې روانې ستونزې به نورې هم ورسره ډېریدې او خلک یې د سرېښو په یوه کرغېړن وژونکي ډنډ کې را حصار کړي وو.
د اخلاقي فساد پراختیا، د باطلو ادیانو او مذهبونو ترویجول، د قومونو ترمنځ د اختلاف او ټکر د زهرجن تخم شیندل او د اسلامي شعائرو پر وړاندې پراخ منفي تبلیغات د هغه ستونزو یوه برخه وه، چې افغان ولس ورسره په مظلومانه توګه لاس او ګرېوان و. دې هر څه د هغه ډالري کڅوړو ملاتړ له ځان سره درلود چې د شر او فساد د لارویانو په جیبو کې اچول شوې وې.
د شر او فساد ډلې، لکه څرنګه چې د اشغال پر مهال یې له پردیو سره خپلې ژورې اړیکې ساتلې وې او د لږو مادیاتو په بدل کې یې خپل خلک او هېواد پلورلي وو، اوس هم له افغانستان څخه بهر شپه او ورځ د پردیو لپاره د نویو چوپړونو او خیانتونو په پلان کولو بوخت دي.
په افغانستان کې د شر او فساد د پلویانو له شرموونکې ماتې او د هغوی د پراخ فساد له افشاء کېدو وروسته، د نویو بادارانو پیدا کول د هغوی لپاره تر بل هر وخت سخت شوي دي، نو ځکه خو یوه شپه د یوه بادار په لمن کې تیروي او سبا یوه بل ته د غلامۍ سر ټیټوي.
دغه بدنامو مشرانو په دې موده کې ډېرې ناستې کړې او د خپلو بادارانو په تشو وعدو ورځې او شپې سبا کوي. تر دې چې په وروستیو وختونو کې یې آن د پاکستان لمنې ته پناه یووړه، په لومړي اقدام کې یې د ډیورند کرښه، چې له افغانستان یوه نه بېلېدونکې برخه ده، هغه هېواد ته ډالۍ کړه چې شل کاله یې ځانونونه د هغه دښمنان بلل.
کله چې د همدې کسانو خپلې شخصي ګټې په خطر کې ولیدې، د پاکستان حکومت یې د خپل ژغورونکي او بادار په توګه ومانه او د هغوی د ناروا غوښتنو مخې ته په ټیټ سر ودرېدل.
یوه خبره چې ټولو ته څرګنده ده، دغه ښکاره او یا د بندو دروازو شاته ترسره کېدونکې غونډې، نه د شر او فساد لپاره کومه ښه پایله لري او نه یې بادارانو ته کومه ګټه رسېږي، ځکه چې د افغانستان ملت اوس تر بل هر وخت د دې خاینانو اصلي څهره پېژندلې او هیڅکله به دوی ته بیا د هېواد د ورانولو اجازه ورنه کړي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.