لوگر کې د کرومایټو د یو کان د استخراج چارې پیلېږي

د کانونو او پټرولیم وزارت وايي، د لوگر د ازرې ولسوالۍ د ببر سیمې د کرومایټو کان چې څه موده مخکې یې داوطلبۍ ته وړاندې کړی و، د داوطلبو شرکتونو په شتون کې د شېرزاد منرال شرکت ته ورکړل شو.له یاد وزارت څخه په خپره شوې خبرپاڼه کې ویل شوي، په دغه داوطلبۍ کې د ۱۹ شرکتونو له جملې ۸ شرکتونو د داوطلبۍ شرطونه پوره کړي وو، چې د شېرزاد منرال د کانونو د استخراج او پروسس شرکت یو ټن د ۱۶۰۰۰ افغانیو رویالیټي په قیمت د پینځو کلونو لپاره ورکړل شو.د خبرپاڼې له مخې، د دغه کان پراخوالی ۰.۲۴ هکټاره دی او یاد شرکت به د ۱۵۱ مېلیونه افغانۍ پانگونه کوي، چې د ټولنیزو چوپړتیاوو سربېره به ۴۵ تنو د کار زمینه هم برابروي او د پینځو کلونو په موده کې به له یاد کان څخه ۵۶۰۰۰ ټنه کرومایټ استخراجوي.د کانونو وزارت د معلوماتو له مخې، د غور ولایت د شهرک ولسوالۍ د سرب او جستو د درېیم بلاک د نیمې برخې تړون د خپلواک کاظمي د کانونو د استخراج او پروسس شرکت سره لاسلیک کړ.:«د درېیم بلاک د نیمې برخې سرب او جست چې ۱۰۵ کیلومټره مربع مساحت لري، ۱۰ مېلیونه ډالر به د ټولنیزو خدمتونو لپاره، د پروسس کارخونې جوړول، له فاریاب څځه تر بادغیس او له غور څخه تر هرات پورې د ۵۰۰ کیلومټره سرک جوړول، ۲۰ سلنه رویالیټي، له عوایدو څخه ۲۰ سلنه مالیه د ځمکې کرایه او دیاد کان ټول پروسس به د هېواد دننه ترسره کېږي.»کرومایټ له اوسپنې ډکه تیږه ده، چې د ډېرو کلکو وسایلو په جوړولو کې کارول کېږي.په هېواد کې د بشپړ امنیت له امله اوس‌مهال د هېواد گڼ کانونو شرکتونو ته ورکړل شوي، چې هره میاشت ترې د حکومت خزانې ته مېلیونونه افغانۍ عواید راځي او ورسره زرگونه تنو ته پکې د کار زمینه هم برابره شوې ده.