د سمیع سادات په مشرۍ متحده جبهه چې له هېواد بهر په امریکا کې سیاسي فعالیتونه کوي، د روانې اګست میاشتې پر پنځلسمه د افغانستان او امریکا د پخوانیو نظامیانو یوه غونډه جوړوي، په دې غونډه کې یو شمېر تبلیغاتي مسایل تر بحث لاندې نیسي، چې په مطرح کولو یې غواړي د امریکا د اوسنۍ ادارې پام ځان ته واړوي او ملاتړ یې جذب کړي.
په یاده غونډه کې د پرځېدلي جمهوریت د پوځ، استخباراتو او امنیتي برخو یو شمېر ټیټ رتبه نظامیان، د امریکايي استخباراتو پخواني کارمندان، پالیسي جوړوونکي او بې اثره څهرې هم ګډون او د بېلابېلو مسایلو په اړه وینا کوي. دوی په افغانستان کې د بشري حقونو وضعیت ترڅنګ، د آزادۍ(!) اخیستلو پر کړنلارو او افغانستان د داخلي مسایلو په اړه ویناوې او بحث کوي.
متحده جبهه چې له څلورو کلونو راپدېخوا په امریکا کې فعالیتونه کوي، په رهبري کې یې څو تنه شهرت طلبه نظامیان را ټول شوي؛ د جبهې له ادرسه د تبلیغاتي بحثونو په مطرح کولو، په پرله پسې توګه هڅه کوي د ټرمپ پام ور واړوي او د افغانستان د بیا ځلي نظامي تسخیر لپاره د هر اړخیزې مرستې غږ اوچت کړي. دوی په څرګنده بهرنیانو ته اجازه ورکوي چې د تل په څېر بیا هم د هېواد په داخلي چارو کې لاسوهنه وکړي او بیا هېواد د یرغل قرباني کړي.
خو د متحدي جبهې یادې ناستې د څو لاملونو له کبله بې اثره دي؛ لومړی: نړۍواله ټولنه دا مهال د خپلو تګلارو له مخې د سیمې د ثبات او سولې د پیاوړتیا لپاره هڅې کوي، نه د نیابتي جنګیالیو د تیارولو. ځکه جګړه او زور هغه لارې دي چې دا مهال نه د دوی لپاره ګټمنې دي او نه د افغانستان لپاره.
دویم: په یاده غونډه کې همدا افغان نظامي څهرې د افغانستان د جګړې په ډګر کې له کاملې ناکامۍ سره مخ وې، د دوی په شمول د دوی مشران او ملګري یې د جمهوریت د امنیتي بنسټونو د کمزوري کولو او پاشلتیا لوبغاړي وو. همدې ستورو لرونکو جنرالانو، ډګروالانو او ټیټ پوړو نظامیانو د سقوط په ورځ حتی د کابل له ښار څخه هم ساتنه ونه کړل، بلکې تېښتې ته یې مخه کړل او پر کابل هوايي ډګر یې هجوم ور وړ.
درېیم: متحده جبهه د هېواد په داخل کې ملاتړ نه لري، ځکه د دغه جبهې مشرتابه د دروغجنو شعارونو په ورکولو د عامو خلکو او حتی خپلو پلویانو باور بایللی دی. د دغه جبهې مشر سمیع سادات له تېرو څلورو کلونو راهیسې په افغانستان کې د نظامي فعالیتونو د پیلولو په عنوان دروغجن شعارونه بدرګه کول، چې له خپل ټول توان سره، سره ونه توانېده چې بریالی شي.
څلورم: د جبهې داخلي کمزوري او مدیریتي ناکامي ډېر بارز او ښکاره دلیل دی، چې له کبله یې دغه جبهه په سیاسي ډګر کې کم رنګه او منزوي شوې ده. د نورو جبهاتو په څېر متحده جبهه هم د سمیع سادات د څو تنو شخصي ملګرو سیاسي ډله ده، چې نه کوم قوي ټیم لري او نه هم بنسټیز مدیریت.
د یادو دلایلو ترڅنګ، یو شمېر نور دلایل او علتونه هم شته چې له کبله یې د متحدي جبهې دغسې سیاسي ناستې بې اثره ثابتېږي او له دې پرته چې پر نړۍ د ملاتړ تکراري غږ وي، نوره هیڅ هم نه ده. په تېر کې هم متحدي جبهې ورته یوه ناسته په امریکا کې جوړه کړې وه، هغه مهال هم د افغانستان په ضد له ناسمو او دروغجنو تبلیغاتو پرته نور څه نه وو او د یادې جبهې لپاره یې ځانګړې لاسته راوړنه نه درلوده.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.