له کابله خپرېدونکې ورځپاڼې(مسیر) په خپله نننۍ سرلیکنه کې د افغانستان د اقتصادي ځان بساینې په نوو لارو چارو بحث کړی دی. ورځپاڼې لیکلي: افغانستان د بیا رغونې او ځان بسیاینې په لاره کې گڼو ننگونو سره مخ دی، د هېواد لپاره د نوښت او نړیوالو همکارۍ نوی لیدلوری اړین دی. په تېرو لسیزو کې، افغانستان تل د بهرنیو مرستو پر تکیه کولو هڅه کړې، خو اوس د وخت اړتیا ده چې دا تکیه بدله شي او هېواد د خپلو داخلي منابعو او نوښتونو پر بنسټ ځان بسیاینې ته لاره هواره کړي.: « د دې موخې تر لاسه کولو لپاره، افغانستان اړتیا لري چې د خپلو منابعو په اغېزمنه کارولو، د ځوانانو د نوښت ملاتړ او په نړیوالو بازارونو کې د خپلې ونډې په زیاتولو تمرکز وکړي. افغانستان باید د خپلو طبیعي منابعو اغېزمنه کارونه وکړي. که څه هم په هېواد کې بېشمېره کانونه، اوبه او ځمکې شته، خو تر اوسه پورې یې گټه په معقول ډول نه ده اخیستل شوې.»
د سرلیکنې له مخې، د نوې ټیکنالوژۍ پلي کول او د بهرنیو متخصصینو سره همکاري کولای شي په دې برخه کې نوې دروازې پرانیزي. افغانستان باید داسې اقتصادي پالیسۍ وړاندې کړي چې د کانونو او زراعت سکتور په پرمختگ کې د نړیوالو پانگهوالو لپاره جذاب وي. د دې لپاره، نه یوازې د تخنیکي ظرفیت لوړول اړین دي، بلکې په دې سکتورونو کې د شفافیت او حساب ورکونې د سیسټمونو ټینگول هم ډېر اهمیت لري. دا به د بهرنیو پانگهوالو اعتماد زیات کړي او افغانستان ته به د پراخې اقتصادي پراختیا فرصتونه برابر کړي.: «د افغانستان ځوانان د نوي فکر او نوښت لپاره بېساری ظرفیت لري او که دوی ته مناسب چاپیریال برابر شي، کولای شي په بېلابېلو برخو کې د نوو فکرونو او محصولاتو راوړونکي وي. حکومت باید داسې پروګرامونه رامنځته کړي چې د نوښت او ټیکنالوژۍ په برخه کې ځوانانو ته ملاتړ او روزنه ورکړي، ترڅو دوی وکولای شي د افغانستان اقتصاد ته نوی ژوند ورکړي. د دې لپاره، اړینه ده چې د پوهنې او لوړو زده کړو سیسټمونه د وخت اړتیاوو ته په کتو سره اصلاح شي او ځوانانو ته داسې مهارتونه ورکړل شي چې په نړیواله کچه رقابت وکولای شي. دا به نه یوازې د کورني اقتصاد د ودې سبب شي، بلکې ځوانان به هم له هېواده بهر تگ ته زړه ښه نه کړي او په خپل هېواد کې به خپلې راتلونکې ته هیلهمن شي.»
په سرلیکنه کې ویل شوي، افغانستان باید د خپلو محلي تولیداتو پر ودې او نړیوالو بازارونو ته پر لاسرسي تمرکز وکړي. د وارداتو پر ځای، هېواد کولای شي په خپلو محلي تولیداتو کې پانگونه وکړي او د صادراتو له لارې د نړیوالو بازارونو برخهوال شي. د دې لپاره، اړینه ده چې د سوداگرۍ چاپېریال ښه شي او د صادراتو پروسې اسانه شي. د نړۍ په گوټ گوټ کې د افغانستان محصولاتو ته وده ورکول نه یوازې اقتصادي گټې لري، بلکې د هېواد نړیوال انځور هم ښه کوي. د دې سره، د افغانستان صادراتي وړتیاوو ته نوی ژوند بښل کیږي او دا به هېواد د نړیوالو سوداگریزو اړیکو په ټینگولو کې مرستندوی کړي .: «افغانستان د نړۍ په ډگر کې د نوښتونو او نړیوالې همکارۍ له لارې ځان بسیاینې ته د رسېدو فرصت لري. دا هېواد کولای شي د خپلو شتمنیو او ځوانانو د ظرفیتونو په سم مدیریت او اغېزمن کارونې سره، د یوې باثباتې، سوکاله، او پیاوړې اقتصادي راتلونکي پر لور گامونه واخلي. د نوي فکر، نوښت، او نړیوالې همکارۍ په مرسته، افغانستان کولای شي په نړیواله کچه ځان یو باثباته اقتصادي قدرت په توگه وښيي. دا به یوازې د افغانستان په کور دننه اقتصادي وضعیت ته وده ورکړي، بلکې د دې هېواد لپاره به په نړیواله ټولنه کې د یو باورمند او متحرک غړي په توگه هم ځای تثبیت کړي.»
