د ریاستالوزراء اقتصادي معاونیت ویلي، چې د ریاست الوزراء اقتصادي مرستیال ملا عبدالغني برادر اخوند په کندز ولایت کې د ۱۰ زره جریبه ځمکې په مساحت د «عبدالرحمن بن سُمره» صنعتي پارک د بنسټ ډبره کېښوده.
خبرپاڼه زیاتوي، چې د ریاستالوزراء اقتصادي مرستیال دغه صنعتي پارک د هېواد د اقتصادي ودې، صنعتي پراختیا او پانګونې لپاره د زمینې برابرولو په برخه کې مهم ګام بللی او زیاته کړې یې ده، چې د هېواد په بېلابېلو ولایتونو کې د کاري فرصتونو د ایجاد او صنعتي ودې لپاره د صنعتي پارکونو د جوړېدو په موخه ځمکې ځانګړې شوې دي، چې پیل یې له کندز وشو.
برادر اخوند ویلي، افغانستان د تولید، پروسس او بستهبندۍ لپاره ډېر مواد لري او په ځینو برخو کې د تولید کچه لوړه شوې او د صادراتو زمینه هم برابره شوې ده. نوموړي ټینګار کړی چې: «پر وارداتو د تکیې راکمېدو لپاره باید تولید پیاوړی، بڼه یې معیاري او صنعتي فعالیتونه پراختیا ومومي.»
نوموړي زیاته کړه، چې په هېواد کې د اقتصادي فعالیتونو، سوداګرۍ او پانګونې لپاره مناسب فرصتونه رامنځته شوي او اوس د کورنیو او بهرنیو پانګوالو او صنعتکارانو لپاره ښه فرصت دی، چې په افغانستان کې پانګونه وکړي. د هغه په وینا، افغان حکومت پانګوالو ته امتیازات منلي او په ډېرو برخو کې یې لازمې اسانتیاوې برابرې کړې دي.
د خبرپاڼې د معلوماتو له مخې، په دغه صنعتي پارک کې به د نساجۍ، درملو، خوراکي توکو، ساختماني موادو، اوسپنې او فولادو او نورو تولیدي برخو کې د پانګونې زمینه برابره شي. همدارنګه جومات، اداري او سوداګریزې ساحې، روغتون، بانک، مدرسه، ښوونځی او نور اړین خدمات هم پکې په پام کې نیول شوي دي.