د ریاستالوزراء اقتصادي مرستیال، ملا عبدالغني برادر د یوه پلاوي په ملتیا د بلخ ولایت حیرتان بندر ته سفر کړی.
اقتصادي معاونیت په یوه خبرپاڼه کې ویلي، چې د دې سفر پرمهال د حیرتان بندر د ۲۴ ساعته خدمتونو پر وړاندې کولو او په دغه بندر کې د امارتي ادارو او شرکتونو پر موجوده ستونزو خبرې شوي او د حل په اړه یې لازمې پرېکړې شوې دي.
د شویو پرېکړو له مخې به له اړتیا سره سم په دغه بندر کې د امارتي ادارو تشکیل زیات شي، لوی او معیاري پارکینګونه، اداري ودانۍ، د تخلیې او بارګیرۍ مرکزونه، پرمختللي لابراتوارونه، معیاري سړکونه او سړې خونې جوړې شي.
پر دې سربېره به یاد بندر کې د اوسپنې پټلۍ موجودې کرښې پراختیا پيدا کړي، د ترانسپورټ او انتقالاتو لپاره به نقلیه وسایط برابر شي، د لوی وزن د معلومولو لپاره به ډیجیټلي تلې او د قاچاق د مخنیوي لپاره به سیار سکنرونه نصب شي.
ویل شوي، د دغو اقداماتو له عملي کېدو سره به د افغانستان او ازبکستان ترمنځ سوداګري نوره هم پراخه او د هېواد پر اقتصادي ودې به مثبت اغېز وشي.