د هېواد د بهرنیو چارو سرپرست وزیر مولوي امیرخان متقي کابل ته له راغلي پاکستاني لوړپوړي پلاوي سره په ګډه ناسته کې ویلي، چې د افغانستان سرپرست حکومت د خپل متوازن او اقتصاد محوره سیاست په رڼا کې د پاکستان په ګډون له ټولې نړۍ سره مثبتې او پر متقابل احترام ولاړې اړیکې غواړي.
د بهرنیو چارو وزارت د مطبوعاتو او عامه اړیکو رئیس حافظ ضیا احمد تکل په یوه خبرپاڼه کې ویلي، چې په دې ناسته کې د بهرنیو چارو وزیرانو، د دواړو هېوادونو ترمنځ پر مهاجرینو، سیاسي، اقتصادي، تجارتي، ټرانزیټي، سترو پروژو، او یو شمیر نورو موضوعاتو خبرې کړې دي.
ښاغلي متقي په دغه ناسته کې، په پاکستان کي د افغان کډوالو پر وضعیت او جبري اخراج خپله ژوره اندېښنه او خواشیني څرګنده کړې او په ټینګار سره یې له پاکستاني چارواکو غوښتي چي هلته د میشتو او راستنېدونکو افغانانو د حقونو د ضایع کېدو مخنیوی وکړي.
له بل لوري د پاکستان د بهرنیو چارو وزیر اسحاق ډار ډاډ ورکړی چې له افغان کډوالو سره به ناوړه چلند نه کېږي او دوی به په دې برخه کي جدي ګامونه واخلي. نوموړي وړاندې ویلي چې پاکستان کې د افغان کډوالو جایدادونه او پانګې د هغوی ملکیت دي او اجناس یې هیڅ څوک نشي ایسارولی، نوموړي ژمنه کړې چې پاکستاني امنیتي ارګانونه به په دې برخه کي د هر ډول خپل سري عمل مخه نیسي.
د بهرنیو چارو وزارت د عامه اړیکو د رئیس په وینا، په دغه ناسته کې همداراز د سفارتي اړیکو پر لوړولو، ګډې همکارۍ، د ویزو پر زیادت او اسانتیا، زارعتي محصولاتو پر چټک انتقال، د سوداګرۍ او ټرانزیټ پر ودې او یو شمېر سترو پروژو لکه افغان ټرانس، کاسا ۱۰۰۰، ټاپي او ټاپ پر اهمیت، روان بهیر او دې برخو ته پر ځانګړي پام خبرې وشوې.
د یادونې وړ ده، چې د پاکستان د بهرنیو چارو وزیر مولوي امیرخان ته بلنه ورکړې چې پاکستان ته رسمي سفر وکړي تر څو د دواړو هېوادونو ترمنځ د لوړې کچې راشه درشه دوام پیدا کړي.