ماليې وزارت خبر ورکړی، چې د دې وزارت وزير، ملا محمد ناصر اخوند او مل پلاوي د ايران د انرژۍ له وزير عباس علي ابادي سره، په افغانستان کې د انرژۍ په برخه کې پر شته فرتتونو، افغانستان ته د برېښنا پر لېږد، د انرژۍ په برخه کې د مسلکي ظرفیت لوړونې او اړوندو نورو موضوعاتو په تړاو خبرې کړې دي.
عباس علي ابادي په افغانستان کې د انرژۍ په برخه کې د پانګونې او له نورو هېوادونو څخه د برېښنا د ټرانزیټ په برخه کې د پوره همکاریو ژمنې کړي.
ابادي ټينګار کړی، چې که د افغانستان د برېښنا شبکه د توزېع لپاره چمتو وي؛ نو ایران بشپړ چمتوالی لري، چي دوه زره میګاواټه برېښنا سمدستي افغانستان ته ولېږدوي.
د معلوماتو له مخې د ايران د انرژۍ وزير، همدا راز د انرژۍ په برخه کې د افغان محصلینو د روزنې لپاره بشپړ چمتوالی ښودلی دی.
په ورته وخت کې، د هېواد د مالیې وزیر، د برېښنا په برخه کې د ګډې مسلکي او تخنیکي کمېټې پر جوړولو هوکړه کړې او یادونه یې کړې، چې یاده کمېټه به د افغانستان او ایران د دوه اړخيزو همکاریو د اقتصادي کمېسيون له اساسي کمېټو څخه وي.


