د بهرنيو چارو وزارت د عامه اړیکو رئیس حافظ ضیاء احمد تکل وایي، د دغه وزارت سرپرست مولوي اميرخان متقي د ايران د بهرنيو چارو وزير سلاکار محمد رضا بهرامي او کابل کې د دغه هېواد سفير سره کتلي.
د ښاغلي تکل په وینا، مولوي امیرخان متقي په دې ليدنه کې ايراني لوري سره د اړيکو پر نوي فصل، وروستيو پرمختګونو، کډوالو او اوبو موضوعاتو خبرې او بحث کړی.
د هېواد د بهرنيو چارو وزير ايران سره د افغانستان اړيکې مخ پر ودې بللي او ټينګار يې کړی چې دواړه هېوادونه له شته فرصتونو بشپړه ګټه پورته کړي.
له بل لوري د ایران د بهرنیو چارو وزیر سلاکار محمد بهرامي کابل ته د ايران د بهرنيو چارو د وزير له وروستي سفر وروسته دوو اړخيزو اړيکو کې نوی پړاو ياد کړی او ټينګار يې کړی چې دواړه هېوادونه وکولای شي خپلمنځي اړیکې په ښه ډول مديريت کړي.
