د کډوالو او بېرته راستنېدونکو چارو وزارت په یوه خبرپاڼه کې ویلي چې، د دې وزارت سرپرست مولوي عبدالکبیر، د اروپايي اتحادیې له شارژدافیرې ویرونیکا بوسکوویچ پوهار او ورسره مل پلاوي سر کتلي دي.
د خبر پاڼې له مخې، په دې لیدنه کې د اروپايي اتحادیې شارژدافیرې د کډوالو چارو پخواني وزیر، شهید خلیل الرحمن حقاني د شهادت له امله د تسلیت مراتب وړاندې کړي او ویلي یې دي، چې اروپايي اتحادیه به د کډوالو او راستنېدونکیو چارو له وزارت سره خپلو مرستو او همکاریو ته دوام ورکړي.
نوموړې زیاته کړې، چې اروپايي اتحادیې د افغان کډوالو لپاره ۴۷ میلیونه یورو مرسته اعلان کړې ده چې د تعلیم، خوراکي توکو، پاکو اوبو او روغتیايي خدماتو په برخو کې به ولګول شي. نوموړې ویلي چې د دې مرستو په تطبیق او عادلانه وېش کې د اسلامي امارت همکاري اړینه ده.
خبر پاڼه کې وړاندې راغلي چې، مولوي عبدالکبیر، له افغانانو سره د اروپايي ټولنې د بشري مرستو له امله مننه کړې او ویلي یې دی، چې په پاکستان او ایران کې د افغان کډوالو پر وړاندې ناوړه چلند او د هغوی په زور ایستلو بهير دې په بېړني دول پای ته ورسېږي.
د کډوالو موضوع دې سیاست پورې نه تړل کيږي او اجازه دې ورکړل شي چې افغان کډوال په خپله خوښه افغانستان ته را ستانه شي.
نوموړي ټینګار کړی، چې د اسلامي امارت له خوا د راستنېدونکیو افغانانو لپاره د ښارګوټو جوړول او ورته د ځمکو وېش په ولایتونو کې روان دي، خو د دې پروژو د لا ښه تطبیق لپاره د نړیوالو بنسټونو همکارۍ ته اړتیا ده.
د کډوالو او بېرته راستنېدونکو چارو وزیر د خبرو پر دوام ویلي، چې اسلامي امارت د اقتصادي پروژو له لارې هڅه کوي د بېکارۍ او کډوالۍ لاملونه له منځه یوسي او تر هغې چې افغانستان اقتصادي خودکفايي ته رسېږي، نړیوالې بشري مرستې دې دوام وکړي.
