د ترانسپورت او هوايي چلند وزارت وايي، نن او سبا ته د هېواد په یو شمېر ولایتونو کې د سختو بادونو، خاورو او دوړو د پېښېدو اټکل دی.
له یاد وزارت څخه په خپره شوې خبرپاڼه کې ویل شوي، په لوېدیځو، سوېلي، مرکزي او ختیځو ولایتونو کې د سالنگونو په گډون د نسبتاً چټکو بادونو، خاورو، دوړو پېښېدو اټکل شته، چې د سرعت کچه یې په بېلابېلو سیمو کې له ۳۰ څخه تر ۸۰ کیلومتره په ساعت سره اټکل کېږي.
د اوبو او انرژۍ وزارت بیا ویلي، د روانې غبرگولي میاشتې له ۷ مې نېټې څخه تر ۸ مې نېټې پورې د هېواد د سیندیزو حوزو په ځینو ځایونو کې د اوبو د کچې د لوړوالي له امله د سېلابونو د راوتلو اټکل کېږي.: «د هایدرومټیورولوژیکي سټېشنونو د بارانونو تحلیل او تجزیې، د اقلیمي بدلون منفي اغېزو، د هېواد د هوا پېژندنې ادارې او د نړیوالي هوا پېژندنې ارگانونو د وړاندوینو له مخې د هېواد په ځينو برخو کې د نسبتاً چټکو بارانونو له امله د سېلابونو راوتلو اټکل کړی چې د دغه ناڅاپي ورښتونو او سېلابونو راوتلو ډېر اټکل د (پنج آمو او کابل) سينديزو حوزو کې شوی دی.»
د یاد وزارت خبرپاڼه کې لیکل شوي، په ذکر شوو نېټو کې د سېلابونو د راوتلو احتمال د بارانونو او واورې د وېلې کېدلو او د اوبو د کچې لوړوالی په ځانگړې توگه د (بدخشان، تالقان، بغلان، پنجشېر، غوربند، کونړ او لغمان) سیندونو پر لاره او د ذکر شوو ځایونو په ځینې سیلبرونو کې شته.
د پرو سږکال د کب میاشتې راهیسې په هېواد کې پرلهپسې ورښتونه کېږي، چې له امله یې گڼو خلکو ته ځاني او مالي زیانونه اړولي دي.
د یادو ورښتونو او سېلابونو تر ټولو خونړۍ څپه په بغلان کې وه، چې له امله یې زرگونه کورونه ویجاړ کړل او تر دوو زرو ډېرو ته یې مرگژوبله واړوله.
