د عامې روغتیا وزارت وايي، نن دوشنبه ۱۴۰۳/۰۲/۱۰مه نېټه په ټول هېواد کې د گوزڼ ضد واکسینو کمپاین پیلېږي، چې څلور ورځې به دوام وکړي.
له یاد وزارت څخه په خپره شوې خبرپاڼه کې ویل شوي، په دې کمپاين کې ماشومانو ته ويټامين A هم ورکول کېږي، نو له دې فرصت نه گټه پورته کړئ، ترڅو خپلو ټولو ماشومانو ته د پوليو واکسين د څاڅکو ترڅنگ ويټامين A هم ورکړئ.
د عامې روغتیا وزارت ویاند ډاکټر شرافت زمان امرخېل وايي، دغه کمپاین به څلور ورځې دوام وکړي او له پینځو کلونو کم عمره لس اعشاریه اووه مېلیونه ماشومانو ته په واکسین ورکړل شي.
د امرخېل په خبره، په روان کال کې تر اوسه په افغانستان کې د پولیو کومه مثبته پېښه نه ده ثبت شوې، خو پرو سږکال د هېواد په ختیځ کې شپږ مثبتې پېښې ثبت شوې وي.
دی وايي، په غور، بامیان او دایکندي کې د ورښتونو او سېلابونو له امله دغه کمپاین اوس نه کېږي او په یادو ولایتونو کې به څو ورځې وروسته پیل شي.
نوموړي له قومي مشرانو، میندو او پلرونو څخه غوښتي، چې په دغه کمپاین کې ورسره همکاري وکړي او خپل ماشومان د پولیو ضد واکسینو څخه پرې نهږدي.
د ډاکټرانو په خبره، پولیو هغه ناروغي ده چې درملنه نه لري او یوازې واکسین کولی شي له دې ناروغۍ ماشومان روغ وساتي.
دوې میاشتې وړاندې په افغانستان کې د لومړي ځل لپاره د گوزڼ د تشخیص لابراتوار جوړ شو او له دې وړاندې د یادې ناروغۍ تشخیص په هېواد کې ممکن نه وو.
د افغانستان سربېره پاکستان او نایجریا هغه هېوادونه دي، چې اوسمهال پکې دغه ناروغي شته او هر کال پرې لسگونه ماشومان اخته کېږي.