نړۍ د افغانستان د اوسني حکومت په وړاندې وخت ناوخت او له تېرو دريو کلنو څخه ناسمې نيوکې، بې ځايه راپورنه او سروي ګانې نشروي، دوی د افغانستان وضعيت ته له خپلو عینکو او ديد ګوري او هغه ډول انګيرنې او تمې لري، کوم چې په نورې نړۍ کې روانې دي، که داسې څه نه وي، نو نوی څيز او د قوانینو تطبيق ورته د بشري حقوقو او د نورو حقوقو د ازادۍ د صلب په معنا سره تعبير کوي.
دوی د اسلامي نظام لخوا د اسلامي شريعت او الهي احکامو تطبيق هم د نړۍ په کچه د بشر ضد او د انسانانو په وړاندې د شکنجې او زور زياتي په توګه د اسلامي نظام کړنې بولي او په بيا بيا يې د بندولو غوښتنې ترسره کوي، د قصاص، د حدودو جاري کول، د امر بالمعروف او نهې عن المنکر کړنې او الهي احکامو تطبيق ورته د بشر خلاف کړنې معلومېږي.
دوی د همداسې الهي احکامو په وړاندې د عامه ذهنیت د بدلون او اسلام ضد فکر جوړونې او په وړاندې يې د سنګر نيونې په هڅه کې دي.
غرب په ټوله معنا په وروستيو دريو کلنو کې هڅه وکړه چې د اسلامي نظام په وړاندې په هره برخه کې هم عملي او هم تبلیغاتي سنګر ونيسي او د اسلامي نظام مشران تر خپل فشار لاندې خپلو غوښتنو ته قايل کړي، خو په دې برخه کې د خپلو موخو په ترلاسه کولو کې پاتې راغلي دي.
د غربي نړۍ په لر او بر کې چې کومه فحشا او بربنډتيا نن او پرون روانه ده، افغان ولس یې هيڅ حتی په اړه يې د خبرو ترسره کولو ته هم نه ده تيار، په لارو او کوڅو کې د هلک او انجلۍ ترمنځ عشق او د خواهشاتو سړول، په شپینو کلپونو کې د زنا او نورو نامشروعو اړيکو او اعمالو ترسره کول او نور داسې اعمال او کړنې دي، چې د مسلمان افغان ولس له عینکو بې حيايي، بربنډتوب او بې غیرتي، خو دوی (غربيان) بيا دا ډول کړنې د بشر پالنې، ساتنې او ازاديو په نومونو سره نوموي چې هيڅ مسلمان او افغان ته د داسې ازادۍ، بشر پالنې او حقوقو غوښتل د منلو وړ دي.
کفري نړۍ که د اسلامي نظام او افغان ولس سره خواخوږي او نږدېوالی په اړیکو او تعامل کې غواړي، نو د اسلامي نظام د الهي او بنسټيزو احکامو او ارزښتونو خلاف دې دښمني او اسلام ضد فکر جوړونه او د تبليغاتو ترسره کول پرېږدي او د افغانستان حالت د ادراک لپاره دې غربي د ازادۍ او بربنډتيا عينکې له سترګو لرې او د افغانستان شته واقعيتونو ته په کتلو دې راپورنه، سروې ګانې او د نظرونو څرنګوالی ترسره کړي، که نه د دوی لخوا د هر اسلام ضد راپور خپرولو سره دوی يوازې خپل حیثیت او دوه مخي توب مسلمان ولس ته روښانه کوي، چې نور هيڅ ګټه پرې نشې مرتب کولای.