د هلمند د کرنې، اوبو لگولو او مالدارۍ ریاست مسوولین وايي، په دغه ولایت کې د بزگرانو او بڼوالو د ملاتړ او ډول ډول مېوو بڼونو دودولو په موخه په یو شمېر بزگرانو او بڼوالو د لوړ ارزښت لرونکو مېوو نیالگي وېشل شوي او ترڅنگ یې ننداریز بڼونه هم جوړ شوي دي.
له یاد ریاست څخه په خپره شوې خبرپاڼه کې ویل شوي، سږکال د هلمند ولایت د کرنې ریاست لهخوا د دې ولایت د مرکز لښکرگاه په گډون د ناوې، نوزاد، موسی کلا او گرمسېر ولسوالیو کې د خُورماوو لس ننداریز بڼونه جوړ شوي دي، ترڅو بزگران وهڅېږي، چې په خپلو ځمکو کې د خُورماوو بڼونه ورغوي.
د دې ترڅنگ هغو بڼوالو ته چې د خُورماوو بڼونه ورته جوړ شوي دي د یادو بڼونو د ښې روزنې او پالنې په برخه کې ورته د مسلکي کارکؤنکو لخوا زده کړې او یو شمېر کرنیز توکي هم ورکړل شوي دي.: «د هلمند دکرنې ریاست د چارواکو په خبره، دامهال عامو بزگرانو پخپلو ځمکو کې د خُورماوو بڼونو جوړولو ته مخه کړې ده چې ورسره یوشمېر بزگرانو په خپلو ځمکو کې د خُرماوو بڼونه جوړ کړي دي.
د هلمند ولایت د کرنې اداره په دې ولایت کې د کرنیزو محصولاتو اصلاح او پیاوړتیا په موخه د مختلفو برنامو له لارې د بزگرو لاسنیوی کوي ترڅو هغوی وهڅېږي، چې د مشروع کرکېلي له لارې خپل اقتصاد پیاوړي کړي.»
اوسمهال په ننگرهار کې د خورماوو بڼونه رسېدلي دي، چې هر کال ترې لسگونه ټنه خورما راټولېږي او د هېواد گڼو ولایتونو ته رسول کېږي.
ننگرهار، هلمند، لغمان، کونړ، خوست او نیمروز هغه ولایتونه دي چې د خورما بوټو پکې مثبته پایله ورکړې ده.