دوشنبه/ د وري ۶ مه یو شمېر نړۍوالو رسنیو راپورونه خپاره کړې، چې د هند اوتارپردېش ایالات قضایي ارګان په دغه ایالات کې ټولې دینې مدرسې تړلې دي.
رویټرز خبري اژانس لیکلي، چې د وري (حمل) په ۳ یمه نېټه د اوتار پردېش ایالات قضایی ارګان د ۲۰۰۴ کال هغه قانون لغوه اعلان کړ، چې له مخې یې دیني مدرسو ته د فعالیت جواز و، یادې ادارې ویلي، چې یاد قانون د هند سکولاریزم له قانون سره په ټکر کې و، نو ځکه لغوه اعلان شو.
اوتارپردېش د هند یو له هغو ګڼ مېشتو ایالاتونو څخه دی، چې یواځې ۲.۷ میلیونه مسلمان زده کوونکي په ۲۵ زره دیني مدرسو کې په زده کړو بوخت و.
په اوتار پردېش ایالات کې داسې مهال مدرسو فعالیتونه بندېږي، چې له دې وړاندې هم هند په پلازمینه نوي ډهلي کې د “اخوند جي” جومات چې ۷۰۰ کاله یې لرغونتوب درلوده نړولی و.
هندي رسنیو د راپورونو پر اساس، څو میاشتې وړاندې د هند په اوتار پردېش ایالات کې د “بابري” تاریخي جومات، چې په ۱۹۹۲ کال کې د تندروه هندوانو لخوا نړول شوی و، د هند حکومت لخوا د یاد جومات پر ځمکه د هندوانو د “رام ” معبد جوړ شو، دغه معبد د هند د صدراعظم “ناریندرا مودي” لخوا پرانېستل شوی و.
له هند څخه په دې وروستیو کې داسې راپورونه خپاره کېږي، چې په دغه هېواد کې د مسلمانانو پر وړاندې تشدد او تندروي زیاته شوې او د دوی مقدساتو ته د سپکاوي ترڅنګ جوماتونه نړول کېږي او پر ځای یې د هندویزم پیروانو لپاره معبدونه جوړيږي.
د روانې روژې میاشتې په اوایلو کې هغه مهال د پوهنتون په مسلمانو محصلین برید شوی و، چې دوی په تراویح لمانځه ولاړ و.