یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.
د ټاپي پروژه چې په لنډو کې د ترکمنستان، افغانستان، پاکستان او هند په معنی ده، په سیمه کې د ګازو یوه له سترو پروژو څخه شمېرل کېږي.
دا ستره پروژه د ترکمنستان د طبعي ګازو له سرچینو پیل او د افغانستان له لارې پاکستان او هند ته لېږدول کېږي؛ د دې پروژې بریالي پلي کېدل نه یوازې د ګټو اخیستونکو هیوادونو لپاره، بلکې د ټولې سیمې لپاره اقتصادي او سیاسي بدلون راوړونکې ده.
افغانستان چې د دې پايپ لاین په لاره کې پروت دی، له بیلابېلو ګټو څخه به یې برخمن کېږي، افغانستان د دې پايپ لاین له لارې کلنی عواید ترلاسه کولی شي چې د هیواد له اقتصاد سره به لویه مرسته وکړي.
د دې پروژې پلي کول به د افغانستان د خلکو لپاره ډیر کاري فرصتونه برابر کړي چې د بیکارۍ په کموالي او د ژوند د وضعیت ښه کولو کې به ګټور وي؛ ټاپي به د افغانستان د ترانسپورت او انرژۍ زیربناوې پراخه کړي چې دا هم د هیواد په اقتصادي وده او پرمختګ کې مرسته کولای شي.
د افغانستان اسلامي امارت د اوسني حاکم نظام په توګه، د امنیت د ساتلو او د ټاپی پروژې د پلي کولو لپاره د اړینو شرایطو د برابرولو په موخه پراخې هڅې ترسره کړې دي.
د اسلامي امارت چارواکو همېشه د دې پروژې پر اهمیت ټینګار کړی او ویلي یې دي چې د هغې د پلي کولو لپاره اړین امنیت تضمینوي؛ دغه هڅې له اسلامي امارت سره د هیواد اقتصادي پرمختګ، له سیمې او نړۍ سره د مثبت تعامل لپاره ژمنتیا څرګندوي.
هغه څه چې په دې منځ کې د پام وړ دي، د دې پروژې د عملي پیل له اعلان راهیسې د باغیانو او مفسدینو پر خولو د چوپتیا مهر، بې ځایه خبرې کول او منفي غبرګونونه دي.
دا غبرګونونه د پروژې له حیاتي ارزښت سره د دوی د شخصي او بهرنیو ګټو د ټکر له امله دي، بغاوتګر چې له دریو کلونو راهیسې یې په هیواد کې د نا امنۍ او اختلاف اچونې هڅه کړې، اوس د دې حیاتي پروژې پیل په خپلو دروغجنو تبلیغاتو د یو ګزار په توګه احساسوي.
دوی د منفي تبلیغاتو په مټ هڅه وکړه چې د دې حیاتي پروژې د پرمختګ او پیل په لاره کې خنډ واچوي، مګر د دې پروژې له عملي پیل سره، د دوی ټولې دسیسې ناکامې او د اوبو پر سر لیک شوې.
د باغیانو د اندیښنې او درد اصلي لامل د ټاپي پروژې عملي پیل دی، دا چې د دې پروژې عملي کېدل د افغانستان لپاره د اقتصادي ثبات او امنیت معنی لري؛ ثبات او امنیت په اصل کې د باغیانو د نوم او شهرت د له منځه تللو په معنی دي.
دوی د کلونو په اوږدو کې د منفي او دروجنو تبلیغاتو له لارې داسې ښوودله چې ګویا په هیواد کې ناورین موجود دی او په دې سره یې ګټې تر لاسه کولې، دا چې اوس نړیوال په افغانستان کې روان پرمختګ ویني، کوم چې له اسلامي امارت سره د افغانانو د بشپړ ملاتړ او د ناورین د نه شتون څرګندونه کوي؛ دې چارې باغیان له ویرې او وارخطایۍ سره مخ کړي.
د ټاپي پروژې عملي پیل نه یوازې د افغانستان د اقتصادي وضعیت په ښه کولو کې مرسته کوي، بلکې د سیمې د ثبات او د هیواد له ګاونډیو سره د مثبت تعامل په برخه کې هم ارزښتمن رول لوبوي.
په همدې حال، باغیان چې د هیواد له هر ډول پرمختګ څخه وېره لري، د افغانستان د خلکو د اقتصادي وضعیت د پرمختګ او غوړېدا شاهد دي؛ له شک پرته د ټاپي پروژې بشپړ پلي کېدل به د افغانستان لپاره یوه ستره بریا او د باغیانو او بهرنیو جاسوسانو پر زړونو کې زهرجن خنجر وي.
