د امریکا ولسمشر ډونالډ ټرمپ سپینه ماڼۍ کې خبریالانو ته ویلي، چې امریکا له روسیې سره ډېره ښه پر مخ ځي او ښايي د کیيف په پرتله له مسکو سره معامله اسانه وي.
ټرمپ دا خبره په داسې حال کې کړې ده، چې هغه تر دې څو ساعته مخکې یې ویلي وو، پر دې غور کوي چې پر روسیې باندې له اوکراین سره د اوربند یوې هوکړې ته تر رسېدو پورې د لویې کچې بندیزونه او تعرفې ولګوي.
هغه همدا راز سپینه ماڼۍ کې د خبرو پر مهال ویلي، که د پوتین پر ځای هر څوک وای له اوکراين سره یې همداسې عمل کاوه.
ياده دې وي چې د ټرمپ له واک ته رسېدو وروسته د امريکا او روسیې اړيکې د ښه کېدو په حال کې دي او له دې څو ورځې وړاندې ټرمپ ويلي وو، ښايي په روسیې په لږېدلو بنديزونو کې آساني راولي.