د امریکا ولسمشر ډونالډ ټرمپ ویلي، چې له ایران سره د جګړې د درولو موقتي تفاهم نور پای ته رسېدلی او له تهران سره د خبرو دوام د وخت ضایع کول ګڼي.
ټرمپ نن د چهارشنبې په ورځ په ترکیه کې د ناټو سرمشریزې په څنډه کې خبریالانو ته وویل: «زما په فکر، اوربند پای ته رسېدلی دی.» هغه زیاته کړه، چې نور نه غواړي له ایراني چارواکو سره اړیکې ولري او باور لري چې له هغوی سره خبرې کومه ګټه نه لري.
د امریکا ولسمشر ویلي، چې د دې موضوع په اړه به له خپلو سلاکارانو سټیو ویټکوف او جرالد کوشنر سره سلا مشورې وکړي، خو ټینګار یې وکړ چې د خبرو مېز ته د بېرته ستنېدو پرېکړه اوس د ایران په واک کې ده.
ټرمپ دغه څرګندونې داسې مهال کړي، چې د امریکا او ایران د ځواکونو ترمنځ د وروستیو بریدونو تبادلې د دواړو هېوادونو ترمنځ کړکېچ یو ځل بیا سخت کړی او د منځګړیتوب له لارې د شخړې د حل هڅې یې له جدي خنډ سره مخ کړې دي.